Gazeta RD
Skandali i njohur si “EEAS-gate” ka vënë në qendër të vëmendjes disa nga figurat më të njohura të institucioneve europiane, ndërsa Prokuroria e Bashkimit Evropian (EPPO) po vijon hetimet mbi tenderët e Shërbimit Europian të Veprimit të Jashtëm (EEAS) për Akademinë Diplomatike të BE-së, raporton Euractiv.
Hetimet e EPPO-së po zgjasin, pjesërisht për shkak të kompetencave më të gjera që prokurorët evropianë gëzojnë, të cilat u mundësojnë atyre të shtrijnë hetimet në juridiksione të ndryshme dhe të analizojnë çdo pistë të mundshme. Ndërkohë, EPPO po bashkëpunon ngushtë me autoritetet kombëtare: në Belgjikë, prokurorët e deleguar të BE-së po punojnë së bashku me policinë federale, ndërsa gjyqtarët belgë kanë autorizuar masa ndërhyrëse, përfshirë kontrolle dhe sekuestrime.
Në qendër të hetimit ndodhet Akademia Diplomatike e BE-së. Pas marrjes në pyetje nga policia, Stefano Sannino dhe Federica Mogherini janë shpallur zyrtarisht të dyshuar, ndërsa hetuesit po vijojnë shqyrtimin e dokumenteve të sekuestruara.
Javët e ardhshme pritet të jenë vendimtare për të përcaktuar nëse EPPO do të zgjerojë hetimin. Deri më tani, skandali lidhet vetëm me tenderin e parë të zhvilluar nga EEAS për akademinë, por nuk përjashtohet mundësia që të përfshihen edhe persona të tjerë.
Largimi i Mogherinit nga Kolegji i Evropës ka shtuar thirrjet për reforma dhe për emërimin e një rektori të ri. Ndërkohë, dalja në pension e parakohshme e Sanninos nënkupton se drejtoria e tij për Lindjen e Mesme ka nevojë për një drejtues të ri të përhershëm.
Në rrezik është besueshmëria e vetë Kolegjit të Evropës, ku trajnohen shumë zyrtarë europianë mbi funksionimin e Brukselit, EEAS dhe Komisionit Europian. Skandali përbën gjithashtu një provë të rëndësishme për Prokurorinë e BE-së, e cila duhet të demonstrojë efektivitet në trajtimin e një çështjeje me peshë të lartë politike dhe institucionale.
