Gazeta RD
Lëvizjet në kupolën e Policia e Shtetit po intensifikohen dhe rastësi nuk ka. Drejtori i Policisë së Durrësit, Vilson Bala, pritet të transferohet në Korçë, ndërsa urdhri zyrtar pret firmën finale. Ende nuk ka njoftim publik për pasardhësin e tij në Durrës. Por ky nuk është një emër i zakonshëm dhe as një lëvizje rutinë.
SPAK dhe hija e dekonspirimit
Në vitin 2024, Bala u mor në pyetje nga SPAK në kuadër të hetimeve për dyshime serioze dekonspirimi të një operacioni policor madhor: aksioni i 31 korrikut kundër të ashtuquajturës “banda e vëllezërve Çopja” në Elbasan.
Operacion i përbashkët me Europol dhe Eurojust, me 33 urdhër-arreste të lëshuara nga GJKKO — por vetëm 13 të ekzekutuara.
Një dështim që nuk shpjegohet pa rrjedhje informacioni të klasifikuar.
Zinxhir pyetjesh dhe dorëheqjesh
Në këtë dosje u pyetën edhe emra të tjerë të lartë:
ish-Drejtori i Përgjithshëm Muhamet Rrumbullaku (dorëheqje pas SPAK),
Neritan Nallbati,
Edmond Rizai,
dhe Ilir Proda — emri që sot firmos lëvizjet.
Zyrtarisht, asnjë masë penale për Balën. Por heshtja nuk është pafajësi, kur hetimi ka qenë real dhe aktiv.
Zëra, hetime dhe fletë-arreste në horizont
Në qarqet mediatike dhe institucionale po qarkullon fort se SPAK, tashmë me drejtues Klodian Braho, po përgatit fletë-arreste për:
drejtues të lartë të Policisë së Shtetit,
dhe figura të larta politike.
Në këtë sfond, pyetja nuk shmanget:
A është transferimi i Vilson Balës një lëvizje administrative… apo një manovër parapërgatitore për të ulur presionin, zhvendosur përgjegjësinë dhe fituar kohë?
Kur firmat bien para arrestimeve, historia shqiptare na ka mësuar një gjë:
lëvizjet bëhen para goditjes, jo pas saj.
SPAK është nën provë. Policia është nën dyshim. Publiku kërkon përgjigje.
