Gazeta RD
Nga Atird HOXHA
Edi Rama sërish në mbrojtje të Belinda Ballukut
Vendimi i Gjykatës Kushtetuese u mor pa arritjen e kuorumit në favor të palës kërkuese. Thënë shkurt: 4 vota pro kërkesës së paraqitur nga Kryeministri dhe 4 vota kundër.
Në këto kushte, kërkesa e Kryeministrit konsiderohet e rrëzuar, çka do të thotë se kërkesa e Strukturës së Posaçme kundër Korrupsionit dhe Krimit të Organizuar (SPAK) rimerr fuqi. Për rrjedhojë, kërkesa për pezullimin e zv. Kryeministres Belinda Balluku është tashmë në fuqi.
Çfarë pritet të ndodhë pas këtij vendimi?
Mendimi im është se, edhe përmes këtij zhvillimi, Edi Rama vijon të mbrojë Belinda Ballukun. Hapi i radhës i mazhorancës dhe i Ramës, si kreu i saj, do të jetë rrëzimi i kërkesës së Strukturës së Posaçme kundër Korrupsionit dhe Krimit të Organizuar (SPAK) për heqjen e imunitetit.
Kjo do të shmangte masat e sigurisë ndaj Belinda Ballukut, qoftë arrestin në shtëpi apo arrestin në burg, për të cilat kërkesa e SPAK ndodhet aktualisht në Këshillin e Rregullores, Mandateve dhe Imuniteteve.
Ky është mendimi i parë që më erdhi menjëherë sapo lexova lajmin për rrëzimin e kërkesës së Kryeministrit në Gjykatën Kushtetuese.
Dua të jem i gabuar në këtë mendim, por të shohim çfarë do të ndodhë në ditët në vijim.
