Gazeta RD
Nënkryetari i Parlamentit, Agron Gjekmarkaj, në vijim të vizitës zyrtare në Parlamentin e Austrisë, zhvilloi një takim me kryetarin e Grupit Parlamentar të Miqësisë Austri–Shqipëri, Michael Hammer, si edhe me anëtarë të këtij grupi parlamentar.
Gjatë takimit, Gjekmarkaj falënderoi z. Hammer dhe deputetët austriakë për kontributin e tyre në forcimin e miqësisë mes dy popujve dhe parlamenteve, si dhe për mbështetjen e vazhdueshme që Austria i ka dhënë Shqipërisë në proceset demokratike dhe integrimin europian.
Ai theksoi se integrimi europian duhet të mbetet një proces i bazuar mbi meritën, standardet demokratike dhe shtetin e së drejtës, e jo thjesht mbi konsiderata gjeopolitike.
Nënkryetari i Parlamentit ndau gjithashtu shqetësimin lidhur me zgjedhjet e 11 majit, problematikat e evidentuara edhe në raportin e OSBE/ODIHR-it, nevojën për më shumë hapësira demokratike për opozitën në jetën institucionale shqiptare, si dhe fenomenin e rrezikshëm të unifikimit të partisë me shtetin.
Po ashtu, ai përcolli përshëndetjet e liderit të opozitës, Prof. Dr. Sali Berisha.
