Carlo Bolino gogolizon protestat dhe mitizon Rama- shtetin…!?

Sipas këtij “bojaxhiu” dhe “papagalli” të Rama- qeverisjes, zgjidhja e propozuar nga organizatorët e protestës, krijimi i një “Kuvendi Kombëtar Qytetar”, që do të zëvendësonte përkohësisht institucionet ekzistuese dhe do t’ia delegonte pushtetin qytetarëve, është një model i rrezikshëm, anarkik dhe jashtë kornizës kushtetuese.

Bollino thekson se ndryshimi i sistemit nuk mund të bëhet duke anashkaluar Kushtetutën, ligjet dhe votën e qytetarëve. Sipas tij, nëse protestuesit synojnë të qeverisin apo të ndryshojnë mënyrën e drejtimit të vendit, ata duhet të organizohen politikisht dhe të kërkojnë mbështetjen e shqiptarëve përmes zgjedhjeve, ashtu siç funksionon çdo demokraci.

Në përfundim, ai shprehet se protesta është një e drejtë demokratike, por legjitimiteti për të qeverisur fitohet vetëm nga verdikti i qytetarëve në kutinë e votimit, jo nga presioni i rrugës.

E përse nuk u rrëzuaka një qeverisje, që për mbi 12 vjet ka nëpërkembur dhe keqperdorur Kushtetutën dhe kompetencat që i njeh ajo?! Që prej 12 vitesh bën biznese të pista me copa Shqipërie dhe me interesa kombëtare, si rrjedhojë e plotpushtetizimit të mafias së trafiqeve e të betonit me mafien politike dhe qeverisëse shqiptare si dhe me mafian ndërkombëtare ndraghetase, arubase…?! Që ka mpak dhe mplak këtë popull?! Edhe që e ka bërë Shqipërinë ndër të parat vetëm për të këqija, për korrupsion, për kultivim dhe trafikim drogrash; për betonizim dhe nivele të larta e të rrezikshme të ndotjes së ajrit, ujit, ushqimeve, ilaçeve…?! Që ka shkatërruar sistemet e arsimit, shëndetsisë, kulturës, politikës sociale, drejtësisë; duke i partizuar dhe politizuar në favor të përjetësimit të komunizmit dhe enverizmit?! Si mund të vazhdohet të durohet dhe mbahet 4, 5, 6…mandate një kryeministër e një qeveri, që e ka shumicën e popullit në varfëri dhe dhuron miliona euro dhe dollarë nga buxheti i shtetit apo fondi i emergjencave natyrore për shou, koncerte dhe veprimtari thjeshtë reklamuese, për të mbuluar realitetin, skandalet dhe dështimet e tyre me gjethe fiqsh ose me degëza dhe fletë kanabizi?! Si mund të rrëzohet me zgjedhje dhe vota një parti- qeveri- kryeministër që vjedhin vota, mandate… me furgona dhe paturpesisht, si hajdutë ordinere apo xhepash?!

Ndryshe nga si mendon dhe dëshiron Carlo Bolino, një nga kukullat e shumta qeveritare, kur nuk ka shtet, por një kryeministër- mbret, që nuk mendon dhe vepron as me kokën e vet, por të ortakëve dhe padroneve të tij, oligarkë ose investitorë strategjikë, shumicës së popullit i bie për detyrë ta ndryshojë këtë realitet!!!