Gazeta RD
Nga Petrit VASILI
Tashmë dy pushteti Rama-Veliaj është fakti më shkatërrimtar që historia e shtetit shqiptar ka parë, një Haxhi Qamilizëm i vërtetë.
Edi Rama, që klithte e ulëriste se do bënte shtetin, është autori de facto i shpërbërjes totale të shtetit.
Kur Veliaj u arrestua, të gjithë kujtojnë vajtjen triumfatore të Ramës, që rrëmbeu frenat e Bashkisë së Tiranës dhe hoqi e vuri kryetar e sekretar të përgjithshëm e drejtorë, duke dhënë mesazhin se është ai zoti i asaj bashkie.
Veliaj vazhdonte të ishte në burg, por po shkarkon e emëron çfarë i do qejfi.
Pyetja që shtrohet është: ku përfundoi triumfatori Rama?
Loja e shantazhit reciprok për zhdukjen reciproke në funksion të pushtetit sa më të madh të secilit prej tyre, është pikërisht vetëm ajo që ka triumfuar, ndërsa shteti, respektimi i ligjit dhe serioziteti shtetëror kanë përfunduar në gropë të plehrave.
Tashmë karshillëku mes këtyre të dyve është i hapur, por ndërkohë paratë e taksave vazhdojnë të vidhen e shpërdorohen, ndërtimi i kullave është çfrenuar krejt, inceneratori inekzistent vazhdon të paguhet, pra, në finale, qytetarët janë viktima e kësaj loje të pisët pushteti, ku këta dy i kërcasin dhëmbët njëri-tjetrit.
Tashmë është e qartë edhe për më të fundit qytetar të këtij vendi se zyra e kryeministrit dhe e kryetarit të Bashkisë janë dy zyra biznesi me paratë dhe interesin publik dhe nuk janë aspak institucione të larta shtetërore, ku veprohet me ligj e Kushtetutë dhe që i nënshtrohen kontrollit të qytetarëve dhe opozitës.
Historia e këtij dy pushteti si rivalitet i egër interesash tepër të errëta ka shkatërruar totalisht besimin e qytetarëve tek shteti dhe ka bërë një dëm kaq të madh në strukturën e besimit publik tek institucionet, sa do të kërkojë një kohë të gjatë që të rikuperohet.
Pra, s’bëhet fjalë për debat politik dhe as shtetëror, por vetëm shantazh i pastër reciprok interesash të pista, si në një lojë shahu, ku secili përdor trafikun e influencave dhe interesave ku ndihet më i fortë brenda dhe jashtë vendit apo grupit të të fortëve që ndeshen në terren për të kapur llokma interesash financiare.
Kjo agoni dy pushteti tregon më mirë se gjithçka fytyrën e Rilindjes si një mekanizëm mafioz pushteti, që nuk ka vija të kuqe, por ka doktrinë pastrimin e parave, narkoshtetin dhe krimin elektoral.
Ndaj edhe rrëzimi i Rilindjes është hapi i parë jetik, së paku për të rikthyer shtetin normal të ligjit në funksion, dhe më pas për rikuperimin e dëmit kolosal financiar që shkon në miliarda euro, të shkaktuar nga këta.
Shfaqja Rama-Veliaj si dy pushtet i vagabondizmit shtetëror do të mbetet një nga faqet më të zeza të historisë së shtetit.
