Gazeta RD
Sekretari i Shtetit, Marco Rubio, njoftoi të mërkurën (09.09.2026) se Shtetet e Bashkuara do ta intensifikojnë edhe më tej luftën kundër mafieve të narkotrafikut që veprojnë në Ekuador, të cilat ai i përshkroi si “ushtri” me kapacitet të madh zjarri.
Rubio u takua në Kuito me presidentin ekuadorian Daniel Noboa, në kuadër të turneut që filloi në Kolumbi dhe do të përfundojë në Peru.
Të tre vendet, të qeverisura sot nga qeveri të djathta të afërta me Uashingtonin, janë pjesë kyçe në zinxhirin e kokainës që konsumohet në Shtetet e Bashkuara, Evropë dhe Azi.
Rubio njoftoi se Shtetet e Bashkuara e kanë shpallur Los Tiguerones, një prej shumë bandave që veprojnë në Ekuador, organizatë të huaj terroriste, gjë që do t’i lejojë të intensifikojnë ndjekjen e drejtuesve, financave dhe bashkëpunëtorëve të organizatës.
“Ne nuk po flasim për një mafie normale, nuk po flasim për kriminelë, po flasim për terroristë që në shumë raste kanë armë dhe pajisje që i ngjajnë një ushtrie kombëtare”, tha ai pas takimit me Noboan.
Los Tiguerones është një nga organizatat më të frikshme në luftën e brendshme që zhvillohet për kontrollin e narkotrafikut në Ekuador.
Në vitin 2025, përplasja për këtë biznes e shndërroi vendin në më të dhunshmin e rajonit, me 51 vrasje për çdo 100.000 banorë: një vrasje çdo orë.
Këto organizata janë të lidhura me mafia të ndryshme, si ajo shqiptare dhe ato të Meksikës. Vlerësohet se 70% e kokainës së prodhuar në Kolumbi dhe Peru kalon përmes Ekuadorit.
Që nga viti 2025, Departamenti i Shtetit ka shpallur gjithashtu organizata terroriste grupet ekuadoriane Los Choneros, Los Lobos dhe Chone Killers.
“Nuk kemi aleat më të mirë në rajon, për sa i përket përballjes me atë që është kërcënimi kriminal transnacional”, tha Rubio pas takimit me dyer të mbyllura me Noboan./DW
