“S’jam dënuar asnjëherë”, protestuesi Ali Bruçi përgënjeshtron Ramën: Do ta ndjek ligjërisht!

Në një intervistë për SYRI TV, me moderatorin Edvin Parruca, Bruçi deklaroi se nuk është dënuar asnjëherë dhe pretendoi se u arrestua pas protestës së 13 tetorit, pasi kishte dalë në mbrojtje të dy vajzave gjatë përplasjes me policinë.

Bruçi kërkoi nga institucionet ligjzbatuese të hetojnë akuzat ndaj tij, ndërsa paralajmëroi se do të ndjekë rrugën ligjore kundër kryeministrit.

Ali Bruçi: Përshëndetje dhe respekt, mirënjohje.

Edvin Parruca: Faleminderit për kohën tuaj. Po.

Ali Bruçi: Jam cilësuar si… Jam cilësuar si person kriminal që unë as vetë s’po e besoj tani, po e them me pastërtinë më të madhe. Unë jam pjesëmarrës, 136 ditë kam qenë në protestë, 3 ditë i kam bërë grevë urie edhe jam me arrest shtëpie, jam lënë me arrest shtëpie aktualisht. Unë kam një dëshmi penaliteti… Unë kam një dëshmi penaliteti, ja nëse fokusohet kamera…

Edvin Parruca: Po.

Ali Bruçi: …që jam i padënuar, e 2020-ës. Kam aplikuar për dëshmi të re sot edhe më është thënë që pas 3 ditësh do ta marr, ta kem të mundur si dëshmi. Ja dhe karta e identitetit… Ali Bruçi, ja nëse e sheh kamera.

Edvin Parruca: Po, e qartë është, po.

Ali Bruçi: Prandaj unë me datë 13, kam marrë nga puna diku nga ora 5 e pak edhe si çdo ditë që dilsha me flamur, jo rastësisht i kam bërë edhe këto, sepse kam qenë i përditshëm në protestë.

Edvin Parruca: Kështu jeni në protestë, po, kështu ju njohim në protestë.

Ali Bruçi: Po, edhe unë nuk kam shkuar për dhunë, nuk kam shkuar për dhunë. Me simbolin kombëtar, edhe kjo është diçka e veçantë sepse është trashëgimi kulturore, e mira e viteve tona. Edhe aty jam arrestuar, jam dhunuar nga policia në shenjë rrëmbimi. Edhe mund të kem bërë ndonjë goditje, jam mbrojtur, si i thonë një fjalë, si çdo njeri tjetër mund ta bëjë këtë pjesë. A më kupton?

Edvin Parruca: Po, keni pasur, le të themi, një përplasje me policinë, po.

Ali Bruçi: Po kjo ishte e padrejtë sepse unë realisht, po të gjenden ato filmimet e atyre, unë kam mbrojtur dy femra, me thënë të drejtën. Jam mbrojtur, kam dalë para policisë… Nuk i mbrojta unë se nuk ka… Po kam dalë para policisë, ‘Mos u merrni me gra e me fëmijë!’ i thashë unë. A më kupton? Krejt është kjo pjesë, po që të kalosh në një organizatë kriminale është diçka e rëndë dhe e kam përballuar… sinqerisht ndihem shumë keq, a më kupton?

Edvin Parruca: Jo e qartë është, patjetër. E qartë është, patjetër.

Ali Bruçi: Prandaj i kërkoj edhe kryeministrit, edhe prokurorisë, që të nxjerrin faktet. Unë këtu në arrest shtëpie jam, s’kam arsye me ik. Le të marr dënimin që meritoj unë për çfarë më thotë kryeministri. Është e padrejtë, është e padrejtë. Na ka thënë iranianë, na ka thënë grekë, na ka thënë që unë s’di si… nuk e di çfarë të them për Zotin, me thënë të drejtën nuk e di. Kjo është e padrejtë.

Edvin Parruca: E qartë, pra ju nuk jeni as i dënuar akoma, as për këtë rast, as më përpara… Se për këtë rast jeni me masë sigurie arrest shtëpie.

Ali Bruçi: Jo jo, unë s’kam qenë i dënuar ndonjëherë në jetë… Vetëm po, me masë sigurie arrest shtëpie kam unë. Për kurrë s’kam qenë i dënuar me vendim të prerë. Po, po, absolutisht. Do vazhdojë procesi. Nëse do dënohem për protestë, le të më dënojnë sa të duan këta, s’është problem.

Edvin Parruca: Dhe ju jeni kapur, jeni ndaluar që ditën e parë të protestës që filloi të ishte me përplasje të vazhdueshme… 13 ishte e marta pra që ishte e para.

Ali Bruçi: Po, diçka e tillë, me datë 13. Po s’kam qenë as në bazë të protestës me thënë të drejtën, sepse është edhe videoja. Diku te Kafe Flora është një tunel që kalon, është një market… nuk e di për Zotin çfarë ngjyre është, nuk e di, diçka e tillë.

Edvin Parruca: Po mirë, ju keni ndërhyrë, jeni përplasur, keni ndërhyrë për dy vajza që po i kapte policia, siç thoni ju.

Ali Bruçi: Nuk kam ndërhyrë, thjesht i kam mbrojtur. Kam dalë, si i thonë një llafi, kam çuar edhe duart lart.

Edvin Parruca: Si shumë njerëz që janë… shumë njerëz, të gjithëve këto ditë mund të na kishte ndodhur që të ishim në këtë moment që t’i kërkonim policisë të ndalonte dhe të mos…

Ali Bruçi: Jo, unë thjesht kam çuar edhe duart i kam pasur lart, me thënë të drejtën. Jam munduar që… pse të dhunojmë një fëmijë edhe një femër, një moshë e vjetër? Mbrohen edhe nga ana morale, o burrë. A më kupton?

Edvin Parruca: E qartë. Ju shqetësuat, e keni shprehur që jeni ndier i shqetësuar, ju të cënuar, kur e patë veten te ajo listë, si ndihet?

Ali Bruçi: Absolutisht. U kërkoj të gjitha institucioneve le të më hetojnë krejt nga A-ja tek Zh-ja, pastaj do merrem unë personalisht nga ana ligjore me kryeministrin.

Edvin Parruca: Pra thoni ju që do merreni personalisht, do merreni nga ana ligjore… e ndjeni veten të shqetësuar ju, të cënuar, kur e patë veten tek ajo listë, si ndihet?

Ali Bruçi: Jam i tronditur sepse të quhesh si organizatë kriminale, a e kupton? Është diçka që s’e… nuk na lejon… Nuk ma lejon morali unë. Edhe gjyshin tim tek puna i kanë bërë në kohën e sistemit komunist. Të njëjtën gjë po bëjnë edhe me mua, a më kupton? Është e padrejtë. Edhe arsyeja që më kanë lënë mua me arrest shtëpie… unë jam vetëm me një rrogë në familje, a e ke parasysh? Si do të ishte puna… Këta kanë liruar xhanin, kanë liruar banditë e kriminela për ashtu, edhe të mbajnë mua me arrest shtëpie. A më kupton? Jam kryefamiljar dhe jam… a më kupton? Është e padrejtë.

Edvin Parruca: Pra ju kanë bllokuar edhe financiarisht, ekonomikisht të gjithë familjen me këtë masë sigurie që ju kanë dhënë juve.

Ali Bruçi: Absolutisht. Çdo… unë s’di qysh… Më e rënda pra që mund t’i ndodhi dikujt për diçka të tillë. Del ky tashin, thotë organizatë kriminale. Kjo është më e padrejta që më ka ndodh ndonjëherë, sepse është zot shtëpie, është i pari i vendit, të akuzojë njerëz të ndershëm që punojnë edhe s’nxjerrin muajin dot me të ardhurat që kanë.

Edvin Parruca: E qartë. Zoti Bruçi, ju falënderoj shumë për këto minuta dhe për komunikimin.

Ali Bruçi: Përshëndes, respekt, mirënjohje. Edhe një thirrje kam për studentët: mos u dorëzoni! Unë në momentin që dal i lirë do të jem në protestë prapë, pjesëmarrës siç kam qenë çdo ditë me simbol kombëtar. Unë nuk e fëlliqi këtë simbol kombëtar. Nëse është për të luftuar për trojet kombëtare dhe për… jam i pari që jam në rresht. Betohem para Zotit që unë do të jem ndër të parët që do të jem përballë hasmit. Jo njerëzve të mi, të rrah njerëzit e mi, vëllezërit e mi, motrat e mia. Për asnjë lloj arsyeje. Respekt, mirënjohje.

Edvin Parruca: Ju faleminderit Zoti Bruçi. Faleminderit.