Gazeta RD
Nënkryetari i PD, Belind Këlliçi, ka reaguar përmes një postimi në Facebook pas qëndrimeve të anëtarëve të Parlamentit Europian lidhur me situatën politike në Shqipëri.
Këlliçi i cilëson deklaratat e eurodeputetëve, veçanërisht ato të kreut të Komisionit të Jashtëm, David McAllister, si një goditje të drejtpërdrejtë ndaj kryeministrit Edi Rama dhe propagandës së tij.
Sipas Këlliçit, në Bruksel u evidentuan korrupsioni, padrejtësitë dhe brutaliteti policor si shkaqet e revoltës qytetare, ndërsa propaganda e qeverisë për agjentë të huaj dhe skenarë destabilizues nuk qëndron.
Ai thekson se zgjidhja e krizës politike kalon përmes largimit të Ramës, krijimit të një qeverie teknike dhe zhvillimit të zgjedhjeve të lira e të ndershme.
Postimi
Parlamenti Europian rrëzon Ramën bashkë me propagandën e tij banale!
Qëndrimet sot të anëtarëve të Parlamentit Europian e në veçanti të kreut të Komisionit të Jashtëm, David McAallister, ishin një goditje direkte për Edi Ramën, qeverisjen e tij dhe rrëzim i propagandës.
Ata njohën korrupsionin, padrejtësitë, arrogancën dhe brutalitetin policor të qeverisë si burimin e revoltës dhe protestave në vend.
Skenari propagandistik i Edi Ramës me agjentë të huaj, me lëvizje Antifa, apo me puçistë të brendshëm, nuk pi ujë askund!
Janë aferat e tij, korrupsioni në çdo sektor dhe inkriminimi që e kanë futur Shqipërinë në krizë.
Sot nga Brukseli ka ardhur mesazhi i qartë dhe pa ekuivok, se për të bërë zgjedhje të lira e të ndershme, duhet larguar Rama.
PE njohu sot realitetin siç është dhe ofroi zgjidhje: Qeveri teknike, zgjedhje të lira e të ndershme!
