Gazeta RD
Jamarbër Malltezi ka përmendur deklaratat e emisarit Gabriel Escobar, ish-zv/ndihmës Sekretar i Shtetit për Europën dhe Euroazinë, duke e cilësuar ndërhyrjen e tij në çështjen ndaj Sali Berishës si të papranueshme dhe në kundërshtim me çdo legjislacion ndërkombëtar.
Në një intervistë për A2CNN, Malltezi theksoi se deklarata e Escobarit – sipas së cilës tashmë “u takon hetuesve shqiptarë të veprojnë ndaj Sali Berishës” – është një formë ndikimi politik mbi një proces gjyqësor.
“Gabriel Escobar ka thënë në një intervistë se ‘ne e kemi bërë punën tonë dhe tani i takon hetuesve shqiptarë të veprojnë ndaj Sali Berishës’. Kjo është influencë pa gjyq, kjo është e kundraligjshme në cilindo legjislacion të botës”, u shpreh ai.
Malltezi shprehu gjithashtu akuza të drejtpërdrejta ndaj ish-ambasadores amerikane Yuri Kim, duke e cilësuar të korruptuar dhe të përfshirë në ndërhyrje të papranueshme në sistemin e drejtësisë. Ai tha se ka njoftuar Departamentin Amerikan të Shtetit për këtë çështje dhe ka përfshirë në raportimin e tij edhe prova mediatike.
“Unë kam njoftuar edhe DASH-in se Yuri Kim është e korruptuar sepse ka vepruar nën urdhrat e Edi Ramës për interesat e Ramës dhe Sorosit. Ajo ka ndërhyrë në një proces gjyqësor duke i bërë presion prokurorëve dhe gjyqtarëve”, theksoi Malltezi.
Sipas tij, pushtetet e pavarura nuk duhet të përzihen me interesa politike apo diplomatike: “Një pushtet i pavarur nuk del në revistë me askënd tjetër”, tha ai.
