Rregulla të reja për hyrje-daljet në zonën Shengen pas 12 tetorit

Zyra e Bashkimit Europian në Shqipëri ka dhënë një njoftim të rëndësishëm sot, 1 tetor, për të gjithë qytetarët, përfshirë shqiptarët, që udhëtojnë për qëndrime afatshkurtra në 29 vendet e Zonës Shengen.

Nga data 12 tetor 2025, do të nisë gradualisht funksionimi i Sistemit të ri të hyrje/daljes, një mekanizëm modern i menaxhimit të kufijve që do të regjistrojë automatikisht:

-të dhënat nga dokumenti i udhëtimit
-datat e mbërritjes dhe të largimit
-të dhënat biometrike (shenjat e gishtave dhe imazhi i fytyrës)

Ky sistem i ri synon të forcojë sigurinë dhe kontrollin e kufijve të BE-së.

Nuk është e nevojshme të bëhet ndonjë veprim paraprak para udhëtimit.

Nuk ka asnjë tarifë shtesë.

Ky ndryshim prek të gjithë udhëtarët nga vendet jo-anëtare të BE-së, të cilët hyjnë në shtetet e Zonës Shengen për vizita afatshkurtra.

Sistemi “Entry/Exit System” (EES) do të zëvendësojë tanimë vulosjen tradicionale të pasaportave me regjistrim digjital të të dhënave biometrike.

Zbatimi i tij parashikohet të ndikojë në mënyrë të drejtpërdrejtë te të gjithë turistët, udhëtarët për qëllime biznesi që nuk janë qytetarë të Bashkimit Europian, përfshirë këtu edhe shtetasit shqiptarë.