Gazeta RD
Nga Kim MEHMETI
Siç raportojnë mediat, së shpejti do themelohet Këshilli i Paqes për Gazën, e që ngjan si të ishte projekt izraelo-amerikan që ka për qëllim ‘varrosjen’ përfundimtare të Organizatës së Kombeve të Bashkuara, e me këtë edhe të gjitha institucioneve të themeluara nga kjo Organizatë.
Me çka bota do vazhdojë të funksionojë njësoj si deri më tani-sipas ligjit të më të fortëve-por tani e rirreshtuar dhe me vetëm një ‘pronar’ që do vendosë në emër të të gjithëve, SHBA-në.
Duke qenë biznesmen që e dinë se ka gjana që nuk shiten, por që mund të blihen me shumë para, Presidenti amerikan ka ftuar të anëtarësohen në ‘klubin e tij’ qindra drejtues botëror që janë të gatshëm të paguajnë ‘bilet hyrëse’ prej një miliardë dollarësh, e nga ku do mund të dalin falas.
Pra, Trampi i ka dërguar ftesë ‘anëtarësimi’ edhe Piktorit, i cili vazhdon ta sundojë Shqipërinë sipas parimit se nuk është i pafytyrë ai që gënjen, por ai që beson dhe se, sikur mos kishte budallenjtë që besojnë, do zhdukej raca e politikanëve gënjeshtarë.
Dhe duke qenë i bindur se nuk është pakësuar numri i budallenjve që e besojnë, Kryeministri i Shqipërisë sa nuk tha se është i vetmi i përzgjedhur i Trampit, se është strateg për të cilin ka nevojë bota, e me çka u dëshmua sa të pavlerë jemi ne që pohojmë se Shqipërinë e ka bërë vend ku hajdutëria është vlerë politike që të ngjitë lart e më lart në piramidën pushtetmbajtëse.
Në të vërtetë, si strateg i dëshmuar për ta dëbuar popullin e vet nga vendlindja, ai edhe do mund të jetë shumë i dobishëm në këtë Këshillë. Posaçërisht nëse nuk do ecë siç duhet ndërtimi i paqes dhe nëse do duhet të zbatohet ‘plani’ izraelit për spastrimin përfundimtarë të Gazës nga palestinezët e mbetur pa kulm mbi kokë.
