Gazeta RD
Nënkryetari i parlamentit, njëkohësisht deputeti i Partisë Demokratike, Agron Gjekmarkaj, denoncoi qeverinë për përfshirje në skandale korrupsioni dhe në lidhje me organizatat kriminale.
Ai mori shkak nga aksioni i fundit i SPAK për sekuestrimin e mbi 40 mln eurove pasuri të ish-drejtoreshës së AKSHI-t, Mirlinda Karçanaj dhe dy biznesmenëve Ergys Agasi dhe Ermal Beqiri, ku përqëndroi sot (23 prill) fjalën e tij nga foltorja e Kuvendit,
Dhe teksa ironizoi kryeministrin Rama se e mori në mbrojtje ish-drejtoreshën si të pastrehë, duke stisur një histori joreale, Karçanaj tha se doli me miliona euro pasuri, vila e apartamente, “së bashku me çetën pas saj”.
“Edi Rama u përpoq të ngjallte keqardhje për një ish-drejtoreshë të paraqitur si e pastrehë, atë të Akshit!
Nuk jam kundër keqardhjes kur ajo është e merituar ! Jam kundër saj kur është e stisur, jam kundër saj kur përdoret si mjet manipulimi publik e politik!
Por dje SPAK-u foli për rreth 50 milionë euro sekuestrime prona të zonjës dhe çetës pas saj, këto janë punët e vërteta që ju bëni për Shqiperine, dikush, merr 20, dikush 50 dikush 100 ato që rrëfeni sa aty këtu janë paturpësi!”, tha deputeti demokrat mes të tjerash nga salla e Kuvendit.
Gjekmarkaj akuzoi mazhorancën se e ka ngritur pushtetin e saj bazuar te korrupsioni dhe jo ligji, te padrejtësia dhe jo te drejtësia.
“Doktrina e saj nuk është drejtësia. Është korrupsioni. Gjuha e saj nuk është dialogu. Është propaganda dhe sharja”, tha ai.
