Gazeta RD
Sekretari politik i PD, dega Elbasan, ka reaguar ditën e sotme përmes një deklarate për mediat lidhur me shqetësimet e banorëve të lagjes Kala për projektin e paraqitur gjatë dëgjesës publike për rivitalizimin e Kalasë së Elbasanit.
Ai u shpreh se, Partia Demokratike është në mbështetje të plotë të banorëve për çdo shqetësim të ngritur prej tyre, pasi sipas tij, ata preken drejtpërdrejt nga ndërhyrjet e parashikuara në këtë projekt.
Sipas sekretarit politik të PD Elbasan, Kalaja e Elbasanit është një pasuri me vlera historike e kulturore që duhet të marrë vëmendjen dhe investimin e merituar, por zhvillimi nuk duhet të bëhet duke cenuar familjet që prej brezash kanë jetuar në këtë zonë dhe kanë ruajtur këtë trashëgimi.
Ai i bëri thirrje Bashkisë Elbasan, projektuesve dhe institucioneve përgjegjëse që të marrin në konsideratë të gjitha shqetësimet e ngritura nga banorët e lagjes Kala, të garantojnë transparencë të plotë për çdo detaj të projektit dhe të rishikojnë çdo ndërhyrje që mund të prekë pronat e qytetarëve.
Sipas tij, ruajtja e trashëgimisë dhe zhvillimi i zonës duhet të ecin paralelisht, duke respektuar të drejtat dhe interesat e banorëve.
