Gazeta RD
Protesta e 30-të kombëtare kundër qeverisë, protestuesit marshojnë drejt Kryeministrisë
Ka nisur protesta e 30-të kombëtare kundër qeverisë. Protestuesit u grumbulluan fillimisht në Sheshin “Skënderbej”, nga ku kanë nisur marshimin drejt godinës së Kryeministrisë.
“Edi Rama, o tradhtar jep dorëheqjen sa më parë”, Edi Rama o tradhtar me Shqipërinë mos bëj pazar”, “dorëheqje”, “dorëheqje”, janë disa nga thirrjet e protestuesve.
Para Kryeministrisë ndodhet një grup tjetër protestuesish, të cilët po i presin pjesëmarrësit që po marshojnë nga sheshi, ndërsa pritet që tubimi të marrë përmasa më të mëdha me bashkimin e të dy grupeve.
Në protestë marrin pjesë qytetarë nga qytete të ndryshme të vendit, si edhe shqiptarë të ardhur nga diaspora. Organizatorët kanë bërë thirrje për pjesëmarrje masive, ndërsa pas mbërritjes së protestuesve para Kryeministrisë pritet të nisin fjalimet e përfaqësuesve të tubimit.
Kërkesa kryesore e protestuesve mbetet dorëheqja e kryeministrit Edi Rama. Sipas tyre, protestat do të vijojnë deri në përmbushjen e kësaj kërkese.
