Gazeta RD
Janë zbuluar detaje të reja nga aksidenti tragjik i ndodhur pasditen e së martës pranë rrethrrotullimit të TEG-ut, në Unazën e Madhe në Tiranë.
Sipas informacioneve, viktima dhe personi tjetër që udhëtonte në kamion janë shtetas egjiptianë. Njëri prej tyre humbi jetën në vendngjarje, ndërsa tjetri u transportua në spital, ku ndodhet në gjendje të rëndë.
Ndërkohë, drejtuesi i automjetit tjetër të përfshirë në aksident është identifikuar si Roland Nuri, 28 vjeç, i cili ndodhet jashtë rrezikut për jetën.
Sipas Policisë së Tiranës, aksidenti ndodhi rreth orës 16:20, kur një kamion pompë betoni u përplas me një automjet. Si pasojë e goditjes, kamioni theu barrierat mbrojtëse të rrethrrotullimit dhe ra në nivelin e poshtëm të aksit rrugor TEG–Elbasan, në drejtim të Elbasanit.
