Gazeta RD
Kryebashkiaku i bëri thirrje Ballës të mos merret me punët e bashkisë, por të fokusohet tek qeveria e cila ka braktisur Kavajën, ndërsa i vetmi institucion që i përgjigjet qytetarëve është bashkia e fituar nga demokratët.
“I them Taulantit të mos shqetësohet për punët e bashkisë. Duhet të shqetësohet për punët e qeverisë, sepse Kavajës ia keni hequr të gjitha. Ka 12 vjet që qeveria nuk ndërton rrjetin e ujërave të zeza në zonën e plazhit. Duhet të shqetësohesh që sot Kavaja nuk ka ujësjellësin, nuk ka Agjencinë Shtetërore të Kadastrës, nuk ka gjykatë dhe nuk ka prokurori. Kavaja nuk ka asnjë institucion, veç bashkisë që i shërben nga mëngjesi në darkë. Mos u shqetëso fare merru me hallet e problemet e qeverisë”.
Qosja shtoi se bizneset, për të cilat Balla shprehet i shqetësuar, në fakt e kanë mbështetur ndërhyrjen dhe se qytetarët kanë kërkuar prej kohësh zëvendësimin e pllakave ekzistuese.
“Të gjitha atyre bizneseve që Taulanti u qan hallin, të cilët më kanë marrë në telefon dhe më kanë kontaktuar, më kanë thënë: ‘Kryetar, ato duhet të ndërrohen’. Çdo qytetar që kalon aty më ka thënë se ato pllaka duhet të hiqen dhe të ndërrohen. Bëmë veprimin e duhur që i hoqëm ato pllaka për ta kthyer bulevardin në një rrugë me asfalt cilësor, me sinjalistikë europiane, siç e meriton qyteti i Kavajës. Do t’i ndryshohet komplet faqja asaj zone”.
Qosja e mbyll videomesazhin duke i kujtuar Ballës se, Kavajën nuk do ta marrë asnjëherë PS.
“Ëndrrat me sy hapur të bëjnë dëm”, tha ai.
