Gazeta RD
Protestuesit që prej 62 ditësh vijojnë tubimet kundër qeverisë dhe kryeministrit Edi Rama kanë përcjellë edhe këtë mbrëmje mesazhe përmes pankartave, ku në fokus kanë qenë edhe zhvillimet e fundit në çështjen e ish-ministrit të Shëndetësisë, Ilir Beqaj.
Një prej pankartave të shfaqura në protestë ironizonte vendimin e GJKKO-së për ndryshimin e masës së sigurisë ndaj Beqajt nga “arrest me burg” në “arrest në shtëpi”.
“I fshiu paratë e shëndetësisë me sterilizim. Tani fshin shtëpinë me regjim! Vjedh në spitale, mbrohet në pallate”, shkruhej në njërin prej mesazheve të protestuesve.
Ndërkohë, një tjetër pankartë ngrinte pyetjen: “Peshku i madh ha të voglin. Po peshkun e madh kush e heton?”, duke kërkuar, sipas protestuesve, përgjegjësi dhe hetim të barabartë për të gjithë.
“Të mëdhenjtë nuk janë mbi ligjin. Llogaridhënie për të gjithë! SPAK heton. Qytetarët presin përgjigje”, thuhej në pankartë.
