Gazeta RD
Deklarata e deputetit të PD, Blendi Himçi
E prezantuar nga Edi Rama si ‘flamuri shqiptar në qiell’, Air Albania po dëshmon çdo ditë e më shumë se ka degraduar njësoj si qeverisja e tij 13-vjeçare.
Partia Demokratike shpreh shqetësimin e thellë dhe kërkon transparencë për situatën financiare dhe ligjore të kompanisë ajrore, të promovuar me bujë propagandistike nga Kryeministri si një histori suksesi dhe si ‘krenaria e qiellit shqiptar’.
Realiteti dëshmon edhe njëherë sin ë shumë raste të kësaj qeverie se punët publike shhen si rast për të bërë propagandë dhe për të bërë ndonjë million.
Sipas njoftimit të publikuar nga Gjykata e Tiranës, Organizata Europiane për Sigurinë e Navigimit Ajror, EUROCONTROL, ka nisur një proces gjyqësor kundër Air Albania për mbledhjen e detyrimeve të papaguara.
Padia, me objekt ‘përmbushje detyrimi’, është regjistruar në Gjykatën e Shkallës së Parë të Juridiksionit të Përgjithshëm Tiranë, ndërsa seanca e parë është caktuar për më 20 tetor.
Ky proces ngre pikëpyetje serioze mbi gjendjen financiare të Air Albania, detyrimet e saj ndaj institucioneve ndërkombëtare dhe mënyrën se si kompania është administruar që nga themelimi.
Air Albania u krijua në vitin 2018, me pjesëmarrjen e Turkish Airlines, kompanisë MDN Investment dhe shtetit shqiptar. Ajo u promovua personalisht nga Edi Rama si një projekt strategjik dhe simbol i suksesit të Shqipërisë.
Partia Demokratike kërkon transparencë të plotë mbi:
• gjendjen financiare dhe detyrimet e papaguara të Air Albania;
• vlerën dhe periudhën së cilës i përkasin detyrimet e kërkuara nga EUROCONTROL;
• përgjegjësitë e administratorëve dhe përfaqësuesve të shtetit shqiptar;
• marrëdhëniet financiare ndërmjet kompanisë dhe institucioneve shtetërore;
• kostot dhe mënyrën e përdorimit të Air Albania për udhëtimet e Kryeministrit Edi Rama.
Një kompani ku shteti shqiptar është aksioner nuk mund të trajtohet si pronë private e Kryeministrit dhe as të përdoret si dekor propagandistik për udhëtimet e tij të luksit.
Shqiptarët meritojnë të dinë se si u katandis ‘krenaria e qiellit shqiptar’ në një kompani të paditur për detyrime të papaguara.
Propaganda fluturoi; faturat, turpi dhe vjedhja mbetën në tokë.
Nëse për turpin nuk do të ketë dënim, për faturat dhe vjedhjet duhet.
