Gazeta RD
42 ditë në protestë kanë shënuar këtë të enjte banorët e Divjakës, të cilët kundërshtojnë reformën e re administrative territoriale të propozuar nga Partia Socialiste, që parashikon bashkimin e Divjakës me Lushnjën.
Edhe pse numri i protestuesve mbetet i vogël, ata vijojnë të protestojnë, duke kërkuar që Divjaka të mbetet njësi administrative më vete.
Në protestën e kësaj të enjteje iu bashkua edhe ish-drejtori i Parkut Kombëtar Divjakë-Karavasta, Ardjan Koçi.
Koçi, i cili disa vite më parë dha dorëheqjen nga detyra, pasi deklaroi se kishte pasur presione lidhur me administrimin e parkut, ka ardhur enkas nga Gjermania për të mbështetur banorët e Divjakës.
Gjatë fjalës së tij, ai kritikoi qeverinë dhe drejtuesit vendorë, duke shprehur mbështetjen për kërkesat e protestuesve.
Me marshimin në rrugët e qytetit, banorët e Divjakës mbyllën ditën e 42-të të protestës, duke përsëritur kundërshtimin e tyre ndaj bashkimit administrativ me Lushnjën.
