Gazeta RD
Një dosje e mbërritur nga autoritetet italiane ka vënë në lëvizje SPAKU-n e cila ka regjistruar një hetim të ri për veprën penale të “Pastrimit të produkteve të veprës penale”.
Në qendër të hetimeve është Artan Gaçi, bashkëshorti i ish-ministres së Mbrojtjes, Olta Xhaçka, ndërsa po kryhen verifikime edhe për përfshirjen e mundshme të kësaj të fundit.
Sipas informacioneve të bëra publike, hetimi i ri ka nisur pas zbulimit të provave gjatë një tjetër procedimi penal.
Bëhet fjalë për një seri transaksionesh bankare dhe komunikimesh të gjetura në aparate telefonike, të cilat dyshohet se mund të kenë rëndësi për zbardhjen e aktivitetit të hetuar.
Gazetari i kronikës, Xhevahir Zhabina, deklaroi në një dalje televizive se hetimet kanë si pikënisje një dosje të përcjellë nga autoritetet italiane, e cila përmban dyshime për pastrim parash dhe korrupsion.
Sipas gazetarit, çështja mund të prekë disa drejtues, ndërsa priten të dalin në dritë detaje të tjera mbi personat dhe transaksionet që po verifikohen nga organet e drejtësisë.
Artan Gaçi është hetuar më parë nga SPAK për çështjen e tjetërsimit të pronave në zonën e bregdetit të Jugut. Ai hetim nisi pas një kallëzimi të bërë nga Fredi Beleri, ndërsa në krye të tij ishte prokurori Olsi Dado.
Megjithatë, procedimi i mëparshëm u pushua nga Prokuroria e Posaçme dhe vendimi u la në fuqi edhe nga gjykatat.
Hetimi aktual paraqitet si një çështje e re, e mbështetur në të dhëna dhe prova të dala gjatë një tjetër hetimi. Sipas informacioneve të publikuara, SPAK po shqyrton transaksione financiare dhe komunikime që mund të ndihmojnë në sqarimin e dyshimeve për origjinën e parave dhe veprimtarinë e personave të përfshirë.
