Gazeta gjermane: Përshkallëzohet revolta studentore në Shqipëri, kërkohet dorëheqja e Ramës

DIE ZEIT

Në kryeqytetin shqiptar, Tiranë, studentët kanë protestuar për të dytën ditë radhazi. Sipas raportimeve të mediave vendase, protestuesit u vunë flakën koshave të plehrave dhe rrëzuan barrierat metalike përpara Ministrisë së Arsimit. Ndërtesa e ministrisë mori flakë gjatë protestës, i tha një dëshmitar okular agjencisë së lajmeve Reuters.

Protesta ishin zhvilluar edhe të martën, kur shpërthyen përleshje që zgjatën me orë të tëra. Sipas raportimeve të mediave, policia shoqëroi 40 persona. Sipas të njëjtave raportime, 13 persona, mes tyre gjashtë efektivë policie, mbetën të plagosur.

Gjatë protestave të së martës, disa demonstrues hodhën tulla dhe pllaka guri, ndërsa policia përdori topa uji, gaz lotsjellës dhe shkopinj gome. Sipas raportimeve, gjatë trazirave u dëmtuan dyqane dhe banka, ndërsa protestuesit sulmuan godinën e bashkisë.

Tubimet u zhvilluan kundër kushteve të këqija të studimit, kostove të larta të arsimit dhe mungesës së perspektivave profesionale. Megjithatë, demonstruesit kërkuan gjithashtu dorëheqjen e kryeministrit socialist Edi Rama, i cili qeveris që prej vitit 2013.

Një valë e re protestash pas “Revolucionit të Flamingove”

Të mërkurën, studentët u mbështetën në protestat e tyre nga nxënës të shkollave, të cilët braktisën mësimin dhe iu bashkuan demonstratave. Ndërkohë, sipas raportimeve, Partia Demokratike e opozitës, e drejtuar nga ish-presidenti dhe ish-kryeministri Sali Berisha, anuloi një mbledhje të grupit të saj parlamentar për të shprehur gjithashtu mbështetjen ndaj protestuesve.

Protesta janë planifikuar edhe në qytete të tjera. Këto demonstrata të kujtojnë protestat e nxënësve në Francë, të cilët dolën në rrugë për të kundërshtuar gjendjen e sistemit arsimor.

Vala e re e protestave po e thellon krizën e vazhdueshme të brendshme politike në Shqipëri. Që prej muajit maj, demonstruesit e të ashtuquajturave protesta të Flamingove kërkojnë dorëheqjen e qeverisë së kryeministrit Edi Rama.

Shkak për protestat u bë një projekt i diskutueshëm ndërtimi i Jared Kushner, dhëndrit të presidentit amerikan Donald Trump, në një zonë të mbrojtur natyrore.