46-vjeçari që u gjet i vrarë në makinë, shofer i deputetit të PS

Detaje të reja kanë dalë në dritë nga ngjarja e rëndë e regjistruar mbrëmjen e 20 tetorit në zonën e Komunës së Parisit në Tiranë, ku 46-vjeçari Ismet Habili, u gjet pa shenja jete brenda automjetit të tij, tip “Volvo”.

Ndërkohë, në njoftimin paraprak për ngjarjen, policia njoftoi fillimisht se bëhej fjalë për një atentat, ku Habili ishte vrarë me armë zjarri.

“Më datë 20.10.2026, rreth orës 20:20, në Sallën Operative është marrë njoftim për një automjet të aksidentuar në rrugën “Mihal Popi”, në bllokun “1 Maji”.

Menjëherë pas marrjes së njoftimit, shërbimet e Policisë kanë shkuar në vendngjarje, ku kanë konstatuar brenda automjetit tip “Volvo”, shtetasin I. H., pa shenja jete, i cili dyshohet se është vrarë me armë zjarri.“, njoftoi fillimisht policia.

Megjithatë pak çaste më vonë, në një njoftim të dytë, uniformat blu hodhën poshtë verisonin e atentatit, duke deklaruar se Ismet Habili ishte vetëvrarë.

Sipas njoftimit, gjatë kontrollit në automjetin e viktimës u gjetën dhe u sekuestruan një pistoletë dhe një gëzhojë.

“Në vijim të informacionit të dhënë pak më parë, për ngjarjen e ndodhur në rrugën “Mihal Popi”, ku u gjet pa shenja jete, brenda automjetit, shtetasi I. H., ju bëjmë me dije se:

Gjatë kontrollit në automjet, u gjetën dhe u sekuestruan një armë zjarri pistoletë dhe një gëzhojë.

Nga veprimet e para hetimore dhe procedurale të kryera, dyshohet se shtetasi I. H., 46 vjeç, mund të jetë vetëvrarë.”–  thuhej në njoftimin e policisë.

Dy versionet e policisë kanë lënë pikëpyetje mbi dinamikën e rastit, teksa po mbrëmjen e kaluar janë publikuar videot nga vendi i ngjarjes, ku duket se policia ka larguar menjëherë nga zona e krimit, makinën brenda së cilës u gjet i vdekur Habili.

Mbetet ende e paqartë nëse puna e Ismet Habilit si shofer i deputetit socialist lidhet me ngjarjen. Ndërkohë, dy versionet e ndryshme të Policisë për vdekjen e tij ngrenë pikëpyetje, të cilat pritet të marrin përgjigje në vijim të hetimeve.