Gazeta RD
Skuadra e Guardiolës mundi Newcastle 1-0 të shtunën, me Julian Alvarez që shënoi golin e vetëm. Në një video të së hënës, trajneri spanjoll u përfshi në një moment paksa komik, kur po kthehej te makina e tij, të cilën e kishte parkuar gabim.
Videoja tregon Guardiolën duke iu afruar një polic trafiku, teksa përpiqet të hyjë në makinë, e cila është e parkuar në vija të dyfishta të verdha. Më pas, polici, pasi e gjobiti për shkelljen rrugore, i kërkoi spanjollit një “selfie”, përpara se të merrte përgjigjen “qesh e ngjesh:” “Dëshiron një foto? Duhet të paguash. Për foton…”
Polici dhe ata që qëndruan rreth Guardiolës më pas filluan të qeshnin, përpara se trajneri i Manchester City të shkonte në pjesën e përparme të makinës dhe të hiqte fletën e gjobës, gati për t’u larguar.
Në fushë nuk ishte një udhëtim i rehatshëm për City kundër Newcastle të shtunën, me “Magpies” që u rritën në lojë ndërsa pjesa e dytë përparonte. Guardiola madje u pa duke pasur një grindje me një tifoz, që e “mori në pyetje” për mungesën e zëvendësimeve. Spanjolli ka zgjedhur të mos bëjë ndryshime në të dyja ndeshjet e City në Premier League, deri më tani, këtë sezon.
Duke folur pas ndeshjes, në të cilën City vendosi një rekord prej 17 fitoresh radhazi në shtëpi, Guardiola pranoi: “Është ndeshja e dytë e sezonit, por dëshmoi pse fitojmë kaq shumë. Mendësia dhe mentaliteti i këtij grupi lojtarësh është i mahnitshëm çdo herë dhe më befason çdo ditë”.
