Gazeta RD
Nga Boldnews.al
Struktura e Posaçme Anti-Korrupsion (SPAK) ka anuluar për herë të dytë tenderin për ndërtimin e godinës së re të institucionit. Fondi limit për këtë procedurë ishte parashikuar në shumën 395 milionë lekë të reja pa TVSH ose rreth 4 milionë euro.
Sipas njoftimit zyrtar nga SPAK-u, të shpallur në Buletinin e Prokurimeve Publike të datës 11 nëntor 2024, tenderi është anuluar për shkak se “nuk është dorëzuar asnjë ofertë e përshtatshme”.
Kjo është hera e dytë që anulohet ky tender. Më herët, Prokuroria e Posaçme shpalli të njëjtën procedurë në gusht të këtij viti. Por, në përfundim të afateve ligjore, SPAK-u u detyrua ta anulojë tenderin e parë në fund të shtatorit, me të njëjtin argument, se “nuk është dorëzuar asnjë ofertë e përshtatshme”.
Duket se edhe procedura e dytë ka pasur të njëjtin fat-pra atë të dështimit.
Për momentin është e paqartë se për çfarë arsye konkrete nuk arrin të finalizohet kjo procedurë dhe ende nuk dihet nëse ka pasur oferta ose jo, pasi argumenti zyrtar i anulimit është i paqartë në këtë pikë.
Godina e re
Tenderi synon përshtatjen e një godine të sapo-ndërtuar, e cila fillimisht ishte përcaktuar për administratën e Ujësjellësit të Tiranës, në një zonë shumë pranë Gjykatës së Posaçme.
Godina disa-katëshe, e cila ka kushtuar mbi 4 milionë euro për ndërtim, iu kalua nën administrim Prokurorisë së Posaçme, pas një marrëveshjeje mes Ministrisë së Drejtësisë dhe Bashkisë së Tiranës.
Objekti, megjithëse i ri, nuk ka një arkitekturë të brendshme shumë funksionale për t’u shndërruar në zyra të Prokurorisë së Posaçme. Për këtë arsye, qeveria shqiptare miratoi kërkesën e SPAK-ut për buxhet, me qëllim, rikonstruksionin e saj dhe përshtatjen për ambjente për prokurorët dhe oficerët e Byrosë Kombëtare të Hetimit.
Pjesë e projektit të përshtatjes është edhe ndërtimi i një tuneli mbi-tokësor, i cili do të lidhë godinën e re të SPAK-ut me ambjentet e Gjykatës së Posaçme.
