Gazeta RD
Ambasadori i BE-së në vendin tonë, Luigi Soreca ka qenë sot në një vizitë në Korçë, ku është pyetur nga gazetarët në lidhje me liderin historik demokrat, Sali Berisha dhe pjesëmarrjen e tij në zgjedhjet e pjesshme lokale të 6 Marsit.
Soreca tha se, BE e ka thënë dhe më parë që nuk kometon dhe nuk ndërhyn në çështjet e brendshme të partive politike.
Gazetari: Berisha nuk është tërhequr nga politika dhe pse është shpallur ‘non grata’ nga SHBA, si e komentoni?
Soreca: Nuk dua të komentoj zhvillimet e brendshme të partisë, ne nuk kemi ndërhyrë ndonjëherë. Do të vazhdojmë punën tonë për të gjitha çështjet që kanë të bëjnë me të ardhmen e vendit sidomos me procesin e vetingut.
Ndërkohë që ambasadori i BE-së mbajti pothuajse një qëndrim të ngjashëm kur u pyet për dënimin me burg të Saimir Tahirit, për të cilin tha se nuk do të dontë që të komentonte qëndrimin e Gjykatave.
Sipas Sorecës, BE ka mbështetur dhe do të vijojë të mbështesë Reformën në Drejtësi, ndërsa përshëndeti zgjatjen e afateve të vetingut.
Ai shtoi gjithashtu se BE do të vazhdojë bashkëpunimin me PD-në, pavarësisht se kush do të jetë kryetari. Një qëndrim ky i ndryshëm me atë të ambasadores amerikane, Yuri Kim.
