Promovohet në Vlorë libri studimor “Triada e Kosovës”

Rezenbrik SERIANI

Në ambientet e Muzeut Kosova në Vlorë, i cili do të përfundojë së ndërtuari këtë vit, Instituti i Studimeve Politike “Ismail Qemal Vlora” promovoi librin studimor të shkrimtarit, publicistit, veprimtarit të çështjes kombëtare, ish- kryetarit të LPK, Bedri Islami, “Triada e Kosovës”.

Në praninë e disa dhjetëra qytetarëve vlonjatë, intelektualëve, personaliteteve të fushave të ndryshme, Historisë, publicistikës, miqve nga Kosova e Maqedonmia e Veriut, nuk kishte rast më të mirë për të evokuar nëpërmjet kujtimeve të protagonistëve dhe faqeve të librit, demonstratat studentore në Kosovë, Lëvizjen Kombëtare të Çlirimit të Kosovës si edhe lidhjen e pashkëputur që kishte kauza e lirisë dhe pavarësisë së Kosovës me Shqipërinë.

Në veprimtari nderuan me pjesëmarrjen e tyre lideri i shqiptarëve në Maqedoninë e Veriut, kryetari i BDI, njëri ndër themeluesit dhe udhëheqës politik i UÇK, zoti Ali Ahmeti, kreu i Kryegjyshatës Botërore të Bektashinjve, Baba Mondi.

Të pranishëm ishin zv/kryeministri i parë i Maqedonisë së Veriut, z. Artan Grubi,; vëllai i heroit të Kosovës dhe Nder i Kombit, Afrim Zhitia zoti Naim Zhitia, deputetët z. Vullnet Sinaj, Fatmir Mediu, Gani Krasniqi deputet, babai i dëshmorit Labinot Krasniqi. Kryetarët e komunave të Drenasit, Ramiz Lladrovci, vëlla i heroit të Kosovës dhe Nder i Kombit, Fehmi Lladrovci dhe Kërçovës, Fatmir Dehari; Hydajet Hyseni, organizator i demonstratave të vitit 1981 dhe drejtues i shoqatës së ish të burgosurve politikë të Kosovës.

Falenderoj folësit: prof. dr. Bardhosh Gaçe, z. Ali Ahmeti, aktorin e madh, Mirush Kabashi për interpretimin e poezive të Bedri Islamit; shkrimtarin Namik Dokle, Ismet Sulejmanin, ish- epror i lartë i UÇK, z. Vullnet Sina, deputet, Ardi Stefa dhe z. Shkëlqim Hajdari.

Falenderoj dy artistët e mëdhenj shqiptarë, Mirush Kabashin, Nder i Kombit për pjesëmarrjen dhe interpretimin e poezive dhe Bujar Asqeriun, Nder i Kombit për moderimin e këtij aktiviteti.

Një falenderim i veçantë shkon për grupin polifonik të Pilurit “Bejkë e bardhë” dhe drejtuesin e saj, Kristo Çipa.

Autori i “Triadës së Kosovës”, miku im i vyer, Bedri Islami, falenderoi të pranishmit dhe evokoi epopenë e asaj lufte të lavdishme dhe protagonistët e saj.

Në përfundim të aktivitetit shoqërova liderin z. Ali Ahmeti, i cili vendosi një kurorë në varrin monumental të Atit të Kombit, Ismail Qemal Vlora.