Anulohen zgjedhjet në Malësinë e Madhe, PD: Transparenca dhe vota e lirë është primare

Partia Demokratike ka reaguar pas incidentit gjatë votimit në Malësinë e Madhe për zgjedhjen e kryetarit të ri të degës së PD.

Një kuti votimi u thye, ndërsa kandidatët pretendojnë për fryrje të listave dhe votim masiv pa qenë anëtar të PD.

Nisur nga këto rrethana, Komisioni i Organizimit dhe Monitorimit të Operacioneve Elektorale, ka vendosur anulimin e zgjedhjeve në degën PD Malësinë e Madhe.

Komisioni njofton se është në procesin e mbledhjes dhe verifikimit të të gjitha fakteve dhe ndodhive që çuan në prishjen e procesit të votimit për të cilat do të shprehet me një vendim zyrtar.

Komisioni vlerëson se integriteti, transparenca si dhe vota e lirë e anëtarëve është primare në këtë proces të rëndësishëm të rithemelimit të Partisë Demokratike.