Gazeta RD
Demokrati Edi Paloka u zgjodh këtë mbrëmje kryetar i Këshillit Kombëtar të Partisë Demokratike me 132 vota përballë Eleina Qiricit e cila mori 79 vota. Në një deklaratë për mediat Paloka theksoi se, më e rëndësishme se rizgjedhja e tij në krye të Këshillit Kombëtar të PD, janë vendimet që u miratuan pasditen e sotme në Këshill.
Kryetari i Këshillit Kombëtar të PD bëri me dije se ditën e nesërme në të gjithë komisariatet e vendit me organizimin e PD do ketë një protestë pas ngjarjes së rëndë në Kavajë ku i riu Ilvi Meta u gjet i vdekur në Komisariatin e Kavajës.
“Më e rëndësishme se rizgjedhja ime në krye të Këshillit Kombëtar ishin vendimet që u miratuan në Këshillin Kombëtar, rezoluta për procesin e zgjedhjeve të Presidentit. Përcaktohet qartazi qëndrimi që duhet të mbajë grupi parlamentar.
Këshilli përcakton linjën politike të PD. Nesër në gjithë Shqipërinë me organizimin e PD do ketë një protestë para të gjithë komisariateve në rrethe për aktin e rëndë në Kavajë ku i riu Ilvi Meta u gjet i vdekur në qelinë e komisariatit të Kavajës”, tha Paloka.
