PD mbështet maturantët

Partia Demokratike mbështet të drejtën e maturantëve për protestë.

Anëtari i kryesisë së PD-së, Grigels Muçollari, në një deklaratë për mediat nga selia blu, u shpreh se qeveria ka krijuar kolaps me maturantët.

Ai kujtoi se maturantët vijnë nga dy vite pandemi, ndërsa u shpreh se testi i maturës është një tregues i paaftësisë së qeverisë.

Deklaratë e PD, anëtari i kryesisë, Grigels Muçollari:

Testi i Maturës është një tjetër tregues i paaftësisë së qeverisë.

Indinjata e tyre, është shenjë se të rinjtë janë gati t’i thonë mjaft kësaj paaftësie që u bëhet barrë.

Deputetët e Partisë Demokratike në një interpelancë me ministren e Arsimit, prej muajsh kanë kërkuar teste pilot për të parandaluar atë që po ndodh sot.

Në ngut e sipër, duke shpërfillur thelbin dhe lartësuar propagandën, Qeveria ka harruar se kjo maturë del nga 2 vite pandemi.

Një administratë që e bën punën dhe e ka nxënësin në qendër të programeve dhe shqetësimeve, duhet ta kishte marrë parasysh këtë.

Kjo pandjeshmëri ka çuar në këtë kolaps.

Partia Demokratike mbështet të drejtën e maturantëve për protestë, dhe u kërkon t’a mbajnë zërin lart, me forcën dhe idealizmin e moshës.

I bëjmë thirrje qeverisë të punojë për zgjidhjet, jo të fshihet e të justifikohet.

Nuk do të lejojmë që, edhe një brez tjetër i zhgënjyer, t’i bashkohet Armatës së Shpopullimit të Shqipërisë, që është shtuar në mënyrë dramatike gjatë qeverisjes së Rama dhe Company.

Shqipëria është në Rrezik.

U bëjmë thirrje maturantëve, studentëve, dhe të gjithë të rinjve, që t’i bashkohen protestës së Frontit të Shpëtimit Kombëtar më 7 korrik.