Gazeta RD
Në ambasadën e SHBA në Tiranë u zhvillua ceremonia me rastin e 4 korrikut, që përkon me 246-vjetorin e Pavarësisë së Shteteve të Bashkuara të Amerikës. Në festën e organizuar nga ambasada amerikane ishin të pranishëm presidenti Ilir Meta, presidenti i zgjedhur Bajram Begaj, ish-kreu i PD, Lulzim Basha, kryeparlamentarja Lindita Nikolla e disa emra të rëndësishëm të politikës shqiptare.
Ndërkaq, ambasadorja Yuri Kim mesa duket kishte vetëm presidentin Meta për të mbajtur fjalimin përshëndetës dhe kjo gjë nuk i ka pëlqyer kryeministrit Edi Rama.
Syri.net mëson nga burime të besueshme se kreu i qeverisë u ka dërguar një mesazh ministrave socialistë që të largohen nga festa.
Ministrat dhe kryebashkiaku i Tiranës Erion Veliaj i janë bindur SMS-së së Ramës. Por bashkë me ta janë larguar edhe Lulzim Basha me Enkelejd Alibeaj, të cilët siç duket kanë marrë SMS-në njësoj si ministrat socialistë.
Pas afro 10 minutash, në festën e Ambasadës Amerikane kanë mbetur vetëm Yuri Kim me Metën dhe disa të ftuar që nuk kishin lidhje me qeverinë.
Madje, edhe Basha i është bindur Ramës, duke u larguar së bashku me socialistët nga ceremonia e organizuar nga Ambasada e SHBA-së në Tiranë. /SYRI.net
