6 Dhjetori, Zëri i Amerikës: Protestuesit do të denoncojnë korrupsionin qeveritar

Në Tiranë, Partia Demokratike që drejtohet nga ish-kryeministri Sali Berisha, bëri të ditur se nuk do të ndryshojë planet për të zhvilluar një tubim proteste pranë selisë së qeverisë në bulevardin Dëshmorët e Kombit më 6 dhjetor, në të njëjtën ditë kur në kryeqytetin shqiptar do të mbahet takimi i nivelit të lartë të Bashkimit Europian dhe Ballkani Perëndimor.

Vendimi u bë i ditur nga zoti Berisha, një ditë pasi Policia e Shtetit refuzoi kërkesën e opozitës për të zhvilluar një protestë pranë kryeministrisë, nën arsyetimin se kjo vendndodhje gjendet brenda perimetrit të sigurisë së takimit të nivelit të lartë të udhëheqëve evropianë e rajonalë. Sipas policisë organizimi i një proteste në këtë zonë, përbën rrezik për sigurinë kombëtare.

Policia theksoi se është e gatshme të garantojë mbarëvajtjen e çdo tubimi, që do të mbahet jashtë perimetrit të sigurisë së takimit të nivelit të lartë. Brenda perimetrit të sigurisë për forcat e zbatimit të ligjit përfshihen sheshi Nënë Tereza, shëtitorja Dëshmorët e Kombit dhe disa rrugë në qendër të kryeqytetit.

Zoti Berisha pohoi se me këtë refuzim, policia po shkel Kushtetutën, pasi siç tha ai, protestuesve u kërkohet nga ligji vetëm të njoftojnë policinë për veprimtarinë e tyre.

Zoti Berisha tha se protestuesit do të denoncojnë korrupsionin dhe autoritarizmin e kryeministrit Edi Rama, dhe protesta me moton “E duam Shqipërinë si Europa” nuk do të cënojë në asnjë rast sigurinë e miqve europianë pjesëmarrës në takimin e nivelit të lartë./VOA/

About Redaksia

Check Also

Bashkëpunëtori i pa identifikuar i laboratorit të Xibrakës, si trafikonte kokainën me makinën e tij, denoncimi i Bardhit

Kreu i grupit parlamentar të PD Gazment Bardhi ka denoncuar sot në një deklaratë të …

Leave a Reply