Gazeta RD
Nga Klodian XHYHERI
Sekretar Politik i PD Vlorë
Varianti më i fundit i përgjimit të miletit nga qeveria, është një lloj aplikacioni që mund të shkarkohet lehtë në telefon, me emërtimin “Aktiv1st”. Një lloj prototipi më i përparuar, më i kamufluar dhe sofistikuar se modeli i parë “Patronazhist”.
Me keqardhje shoh se njërëzit që regjistrohen në këtë aplikacion alla “Sigurim Shteti”, me moton “Fuksat në aktivitet të plotë”, janë pothuaj 98% administratë shtetërore. 2% e tyre njësoj si dikur, janë spiuna të devotshëm që nuk mungojnë në çdo sistem, shtet e dovlet.
Nuk e kam shqetësimin me qeverinë se ajo në rregull i ka punët me hajdutëritë dhe kërkon me çdo mjet e mënyrë të mbajë në këmbë sistemin kusaro-dikaturë që ka ngritur, sesa e kam me ata “Patronazhistë” e “Aktiv1stë”, që robërohen për një copë rrogë, e leqendisen duke spiunuar: kunatin, vëllain, xhaxhain, fqinjin, shokun, mikun, pijanecin e lagjes apo edhe llafazanen e mëhallës.
Veprimi i ulët i spiunimit, duket se jo vetëm na shëmton si karakter, po rrekemi madje të bëjmë një punë joligjore dhe mbajmë në këmbë një regjim, i cili po e shkërrmoq kombin tonë në çdo gjymtyrë të tij.
Në ana tjetër, shifrat duken se ngrihen rrufeshëm çdo ditë me ikjet e të rinjve.
Me sa kuptojmë, kjo ikje nga fëmijët tanë vjen jo vetëm si një protestë e brendshme, në pamundësi për të ndryshuar diktatin e shtruar këmbë kryq, por edhe si një injorim që na bëhet neve si shoqëri pa dinjitet e ndërgjegje demokratike, aq sa përfundojmë spiunë të njëri-tjetrit, sepse Sulltan-Salepit kështu ia do puna për të mbajtur në këmbë regjimin e krijuar me aq zell nga Ai vetë.
Ekonomia po dihet; atë e ka marrë perrupia.
Mirëpo ditëzinjtë “Aktv1stë” e “Patronazhistë”, mbeten në krye të detyrës, pa u bërë aspak përshtypje as ekonomia në vdekje klinike e as kuja e shpopullimit.
Me keqardhje them: -Ku po ju çon mushka, o ditëzinj?!
Përpos rolit neveritës të spiunit, si 1200-shat dikur, i bëj pyetjen kësaj “Soj-Fare”: – Nuk ju vjen keq për fëmijët tuaj dhe të ardhmen e tyre?!
Kam përshtypjen se ajo vlen më shumë sesa një rrogë, që të jep regjimi-sekt.
Me duart tona, me dhe pa vetëdije, po mbajmë në këmbë një karakatinë-diktaturë, që ka shuar çdo ravijëzim të demokracisë sonë të brishtë dhe po i japim ashtu si padashur oksigjen një sistemi që gjithnjë e më shumë i ngjan si në ADN, ashtu edhe në pamje fizike, Partisë Komuniste dhe diktaturës moniste 45 vjeçare, që aq shumë plagë i ka hapur shoqërisë sonë.
Krejt e sigurt që pas këtyre modeleve, priten modele të tjera më të zhvilluara teknologjikisht të tipit: “Aksion1st”, “Sigur1ms”, “Pionerist”, “Ed-ver1st”, “Fuks1st”, që na evokojnë një kohë sa qesharake, aq edhe tragjike.
E si për ironi, vazhdojmë melodinë me strofën: “Parti Ed-ver, jemi gati kurdoher’ !”
