Meta: “Kukullat” e rilindjes nuk i afrohen kandidatëve tanë!

Kryetari i Partisë së Lirisë, Ilir Meta ka marrë pjesë në prezantimin e kandidatit të koalicionit “Bashkë Fitojmë” në Gramsh, Hasim Çekrezi. Përpara mbështetësve të opozitës, Meta mbajti edhe një fjalim ku analizoi qeverisjen të cilën e quajti të dështuar.

Meta tha se bilanci i qeverisë është katastrofik. Kandidatët e Ramës për Elbasanin dhe Durrësin, Meta i quajti “kukulla” teksa shtoi se ata nuk mund të krahasohen me Luçiano Boçin apo Igli Carën.

“Nuk pranon kukulla e Rilindjes në Elbasan ballafaqim me Luçiano Boçin. Nuk pranon kukulla në Durrës ballafaqim me Igli Carën. Nuk pranon mashtruesi në Tiranë ballafaqim me Belind Këlliçin. Bilanci i tyre është katastrofik, ata nuk kanë asnjë mundësi të ballafaqohen me alternativat e kandidatëve tanë”, u shpreh Meta.

Ilir Meta tha gjithashtu se më 14 maj qytetarët e Gramshit duhet të ndëshkojnë arrogancën e kësaj qeverie, ndërsa kërkoi të votohet kandidatura e Hasim Çekrezit.

“Ndaj dhe ne mbështesim me shumë entuziazëm kandidaturën e tij sepse besojmë që populli i Gramshit, që është një popull që dallohet për patriotizëm, një popull punëtor, shtetdashës, një popull që jep për vendin duhet edhe të marrë. Nuk mundet më Gramshi të votojë për të vazhduar arroganca e atyre që kanë plaçkitur Gramshin. Rilindja ka dështuar totalisht, rilindja nuk ka kandidatë përballë kandidatëve tanë.

Shpesh mendoj si ikën 4 vjet me një pushtet monist, ilegjitim, pa një këshilltar të opozitës. Një kohë e humbur, një shkatërrim për bashkitë tona kudo, një zgjedhë e pamerituar për qytetarët tanë. Ju e dini si është keqqeverisur Gramshi në këto 4 vite. Por unë e di mirë si është keqqeverisur Tirana në këto vite. Askush nuk e di kush ka qenë kryetari i këshillit bashkiak, sepse kurrë nuk është bërë një mbledhje.

Mbi 1 mld euro të taksave të qytetarëve të Tiranës janë shpërdoruar në errësirë të plotë. Kur kjo ka ndodhur në Tiranë, ca mund të ndodhë në Gramsh. Koalicioni bashkë fitojmë rikthen kontrollin. Jemi të vendosur për një transparencë të plotë. Ne jemi të lumtur që mbështesim kandidatë që kanë një legjitimitet të jashtëzakonshëm”, theksoi Meta.