Gazeta RD
Nënkryetari i PD, Oerd Bylykbashi ka takuar në Bruksel komisionerin për Zgjerimin e BE, Oliver Varhelyi, anëtarë të Parlamentit Europian si dhe zyrtarë të BE. Në një postim në rrjetet sociale, Bylykbashi shkruan se ka përcjellë te përfaqësuesit e lartë të BE, faktet për maskaradën zgjedhore të 14 Majit.
I ftuar në Bruksel nga Fondacioni për Hungarinë Qytetare, numri dy i PD ka theksuar se në Shqipëri ka degraduar demokracia, pluralizmi dhe ndarja e pushteteve.
Postimi i plotë
Me ftesë të Fondacionit për Hungarinë Qytetare sot pata takime në Bruksel me Komisionerin për Zgjerimin në BE z. Oliver Varhelyi, eurodeputeten dhe zëvendës presidenten e Fidesz, zj. Kinga Gál, eurodeputetin Andor Deli, zyrtarë të BE dhe përfaqësues të medias ‘European Conservative’.
Ndava me ta faktet për shkeljen brutale të standardeve evropiane për zgjedhje demokratike, për maskaradën e zgjedhjeve të 14 majit dhe degradimin e situatës së pluralizmit, demokracisë, ndarjes së pushteteve, shtetit të së drejtës dhe drejtësisë në Shqipëri.
I sigurova miqtë hungarezë dhe evropianë për mbështetjen e palëkundur të PD për procesin e integrimit të Shqipërisë në BE. Më shumë Evropë, më pak autokraci e Edi Ramës!
