Kurti: Hyrja e forcave serbe në Kosovë është agresion

Kryeministri i Kosovës, Albin Kurti, ka reaguar për rrëmbimin e tre policëve brenda territorit të kosovës nga forcat serbe.

Në një postim në Facebook, Kurti thotë se ka dyshime se policët janë rrëmbyer si hakmarrje e Serbisë për arrestimin e djeshëm të kriminelit famëkeq Millun Millenkoviq – Lune.

Ai ka kërkuar lirimin e menjëhershëm të zyrtarëve të rrëmbyer dhe u ka bërë thirrje ndërkombëtarëve ta dënojnë aktin e agresionit të Serbisë.

Reagimi i plotë

Tre zyrtarë të policisë së Kosovës janë rrëmbyer sot në Leposaviq në vendin ku dikur kishte një rrugë ilegale të kontrabandës e që ndodhet rreth 300 metra në brendësi të territorit të shtetit tonë.

Dyshojmë që ata janë rrëmbyer nga ushtria e Serbisë, qartazi si hakmarrje e Serbisë për arrestimin e djeshëm të kriminelit famëkeq Millun Millenkoviq – Lune, i cili paraqet një ndër krerët e krimit të organizuar dhe kontrabandës.

Policia e Kosovës është treguar tejet e vetëpërmbajtur këto javët e fundit.

Hyrja e forcave të Serbisë në territorin e Kosovës është agresion dhe synim për eskalim dhe destabilizim.

Kërkojmë lirimin e menjëhershëm të tre zyrtarëve të rrëmbyer policor dhe ftojmë faktorët ndërkombëtarë që të dënojnë këtë akt agresioni të Serbisë.