Gazeta RD
Ylli francez i ka prishur përfundimisht punët me Paris Saint-Germainin, i cili është i gatshëm ta shesë futbollistin problematik. Dhe “Marca” ka zbuluar shumën e parave që po i kërkon kampioni francez për ish-futbollistin e Monacos. Sipas medias spanjolle, klubi nga “Parku i Princave” i kërkon 250 milionë euro për kartonin e 24 vjeçarit.
Mbetet të shihet nëse presidenti i Realit, Florentino Perez do të jetë i gatshëm ta paguajë këtë shifër, e cila do ta thyente rekordin botëror, të cilin e mban braziliani Neymar, që ishte transferuar për 222 milionë euro nga Barcelona pikërisht në PSG.
Parisienët së fundmi e morën një ofertë prej 300 milionë eurosh nga Arabia Saudite për Mbappen, por lojtari ishte kategorik në refuzim pasi në mendjen e tij është vetëm klubi mbretëror spanjoll.
Përfaqësuesin francez thuhet se e duan edhe dy klubet angleze, Liverpool e Arsenal, por kampioni i botës me Francën i ka idetë e qarta rreth së ardhmes së tij.
Mbappe refuzoi ta vazhdonte kontratën me PSG-në për një vit tjetër, ndonëse e kishte lënë si opsion kur e nënshkroi kontratën dyvjeçare me këtë klub në verën e vitit të kaluar, kur e “tradhtoi” Real Madridin.
