Gazeta RD
Pas përmbytjes së urave një ditë më parë, këtë të shtunë rruga e Arbrit është dëmtuar edhe më shumë. Në fshatin Fshat rruga ka pësuar çarje të asfaltit. Siç mund të shihet nga pamjet e gjithë rruga është e ndarë në dy pjesë duke krijuar imazhin e një situate apokaliptike për shkak të rrëshqitjeve të dheut.
Në qarkun e Dibrës reshjet e shiut kanë vijuar pa ndërprerje duke krijuar probleme në qarkullimin e automjeteve. Gazetari Enver Doçi raportoi për Balkanweb se niveli i asfaltit në rrugën e Arbrit është ulur, ndërsa raportohet për një banesë të dëmtuar nga reshjet. Probleme ka edhe rruga nacionale Klos – Bulqizë me rënien e gurëve duke i detyruar autoritetet që të devijojnë trafikun në rrugën e vjetër.
Rruga e Arbrit
Rruga e Arbrit është koncesioni i parë i qeverisë socialiste për ndërtim rrugësh me vlerë 40.3 miliardë lekë ose 383 milionë euro me kursin aktual. Marrëveshja e koncesionit për ndërtimin e kësaj rruge u firmos në Mars të vitit 2018 me kompaninë Gjoka Konstruksion, e cila u përzgjodh përmes një ligji me procedurë të veçantë negocimi.
Sipas kontratës së koncesionit kompania do ta ndërtonte rrugën me paratë e veta dhe do ta mirëmbante atë për 13 vjet ndërkohë që qeveria do ta shlyente me këste nga buxheti i shtetit. Ndërtimi i rrugës ka hasur në probleme veçanërisht me hapjen e tunelit për shkak të formacionit të paqëndrueshëm gjeologjik.
Rruga është inauguruar nga qeveria dhe aktualisht mundëson lëvizjen përmes një devijimi deri në përfundimin e tunelit. Por herë pas herë ky aks paraqet probleme në qarkullim për shkak të shembjeve, rënies së gurëve, përmbytjeve dhe tashmë edhe çarjes së asfaltit.
