Grabitet nën kërcënimin e armës një supermarket në Kavajë

Një grabitje me kallashnikov ka ndodhur mbrëmjen e sotme në Kavajë. Burime nga policia thanë se, rreth orës 18:40 të mbrëmjes së sotme një person i armatosur me një kallashnikov është futur brenda ‘Maximarket’ dhe ka marrë një shumë të madhe parash.

Nga ngjarja nuk ka persona të dëmtuar, ndërkohë që policia ka mbërritur në vendin e ngjarjes dhe ka nisur hetimet.

Njoftimi i Policisë

Rreth orës 18:40, në Qerret, Kavajë, një shtetas ende i paidentifikuar, nën kërcënimin e një sendi të dyshuar si armë zjarri, ka hyrë në një market ushqimor, ku ka marrë një sasi parash, dhe më pas është larguar.

Shërbimet e Policisë kanë shkuar menjëherë në vendngjarje dhe vijojnë kontrollin e zonës për kapjen e autorit.

Grupi hetimor nën drejtimin e Prokurorisë po punon për identifikimin e kapjen e autorin dhe dokumentin ligjor të ngjarjes.