Ti duhet të duartrokasësh…

Nga Boldnews.al

Ti duhet të duartrokasësh SPAK-un. Ai është zemra e Reformës në Drejtësi, që u bë vetëm për ty!

Ti duhet të duartrokasësh SPAK-un, se po nxjerr nga jeta politike Sali Berishën, atë “non grata-n”, atë përgjegjësin për Piramidat, për “21 janarin”, për “korrupsionin madhor”, makar edhe për “vrasjen e Kenedit”, atë që mbi 500 mijë vota qytetarësh po e mbajnë në politikë dhe e kanë zgjedhur si drejtues të opozitës.

Ti duhet të duartrokasësh SPAK-un, se po tenton të nxjerrë nga jeta politike Ilir Metën, atë të “bllokut 700 mijë euro”, atë që “kundërshtoi i pari Reformën në Drejtësi”, atë që “vodhi Thesarin e Krrabës”, makar, edhe “thesarin e piratëve të Karaibeve”, atë që e mbajnë si numri dy të opozitës mbi 100 mijë vota qytetarësh.

Ti duhet të duartrokasësh SPAK-un, se po rregullon disa statistika për raportet ndërkombëtare me Shqipërinë.

Ti duhet ta duartrokasësh SPAK-un, se, kemi thënë, ai do ta na integrojë në Bashkimin Europian.

Ti duhet ta duartrokasësh SPAK-un, se po mundohet me mish e me shpirt që të bëjë më të mirën për popullin, t’i japë “liderit global” të drejtën e mbretërimit në këtë cep të botës.

*
Ti nuk duhet ta kritikosh SPAK-un, edhe pse arreston Lefter Kokën, por nuk guxon të hetojë kryeministrin Edi Rama për “firmat fap e fap” në aferën e inceneratorit të Elbasanit dhe Fierit.

Ti nuk duhet ta kritikosh SPAK-un, edhe pse kërkon arrestimin e Arben Ahmetaj, por nuk guxon as t’i përmend emrin kryeministrit Edi Rama dhe kryebashkiakut të Tiranës, Erion Veliaj në aferën e inceneratorit të Tiranës.

Ti nuk duhet ta kritikosh SPAK-un, edhe pse arreston Berishën për ish-kompleksin “Partizani”, por nuk guxon të përmendë emrin dhe rolin e ish-kryebashkiakut të Tiranës, sot kryeministrit të vendit, Edi Rama, në atë çështje.

Ti nuk duhet të kritikosh SPAK-un, pse nuk ka guxim të hetojë “ligjet me porosi” të Edi Ramës.

Ti nuk duhet të kritikosh SPAK-un, pse nuk ka guxim të hetojë Ramën për “investitorët strategjikë”.

Ti nuk duhet të kritikosh SPAK-un, pse nuk ka guxim të verifikojë rolin e kryeministrit Edi Rama në aferën e “McGonigalit” amerikan.

Ti nuk duhet ta kritikosh SPAK-un, edhe pse arreston të gjithë drejtorët e Bashkisë së Tiranës, por Erion Veliaj quhet vetëm “titullari i autoritetit kontraktor”.

Ti nuk duhet ta kritikosh SPAK-un, edhe pse arreston të gjithë zyrtarucët e koncesionit të inceneratorit të Tiranës, por nuk guxon të prek Veliajn, që i ka dhënë udhë me firmë të paligjshme kësaj skeme gjigande korruptive.

Ti nuk duhet të kritikosh SPAK-un, edhe pse nuk merr guximin të hetojë Veliajn për shndërrimin e Tiranës në një lavatriçe të stërmadhe për pastrimin e parave në ndërtim.

Ti nuk duhet ta kritikosh SPAK-un, edhe kur dhjetra milionat e eurove të përdorura për rrugët kanë përfunduar kushedi se ku dhe nuk ka guxim të hedhë sytë njëherë nga veprimet e Belinda Ballukut.

Ti nuk duhet ta kritikosh SPAK-un, edhe kur nuk pati guxim për të hetuar skemën korruptive të vjedhjes së votave në Dibër, ku ishin përfshirë e gjithë klani qeveritar.

*
Ti nuk duhet të kritikosh, madje duhet të duartrokasësh Reformën në Drejtësi, edhe pse kupola e institucioneve të reja u mbush me “rilindas” dhe “sahan-lëpirës” të Ramës.

Ti nuk duhet të kritikosh, madje duhet të duartrokasësh Reformën në Drejtësi, edhe pse gjyqet e tua mund të zgjasin me vite të tëra dhe të drejtën mund ta marrësh në jetën e amëshuar.

Ti nuk duhet të kritikosh, madje duhet të duartrokasësh Reformën në Drejtësi, pasi ajo hoqi gjyqtarët dhe prokurorët e korruptuar, por po mbushet me aktivistët e fondacionit “Qemal Stafa”, të Edi Ramës.

Ti nuk duhet të kritikosh, madje duhet të duartrokasësh Reformën në Drejtësi, edhe pse ti apo një afërmi yt mund të shkojë në burg për një dritare pa leje dhe “mjeshtrat” që rrinë pranë Ramës e Veliajt konsiderohen si “biznesmenë të suksesshëm” kur ndërtojnë kullë pa leje mbi kullë e nuk u hyn asnjë gjemb në këmbë.

*
Nëse për një moment, sado të vogël, të kalon, në mendjen tënde idea e çartur për të kritikuar SPAK-un dhe Reformën në Drejtësi, për të kërkuar standard normal drejtësie, mbaj në vëmendje se:

Ti nuk dëshiron avenirin europian të Shqipërisë.

Ti del kundër interesave të administratës së “partnerit tonë strategjik”.

Ti je i shitur me rubla ruse dhe, si individ, bëhesh menjëherë subjekt i atij Komisionit për Dezinformim. (A thua se Donald Trump dhe gjysma e amerikanëve që nuk e duan politikën e “administratës” janë të shitur me rubla?)

Pra, ti duhet vetëm të duartrokasësh, është një veprim fizik që të bën mirë për shëndetin.

About Redaksia

Check Also

Dhjetë fakte mbi falsitetin e Rezolutës antikorrupsion të sektit Rama

Bujaf Leskaj Projekt-rezoluta e propozuar nga PS për luftën kundër korrupsionit dhe mirëqeverisjen do t’i …