Gazeta RD
Kryetari i Partisë Demokratike, Sali Berisha ka vlerësuar protestuesit për qëndresën e tyre të treguar në këto 11 vite të qeverisë së Edi Ramës, pavarësisht bindjeve politike.
Në fjalimin e tij para mbështetësve tek Rruga e Shpresës, kreu i Partisë Demokratike Sali Berisha ka komentuar mitingun e Ramës në Athinë. Berisha shprehet se shqiptarët në Athinë i rezervuan përshëndetjen që meriton armiku i tyre, duke e lënë në mëshirën e Elisës për të thënë dy fjalë ngushëlluese.
Lideri i opozitës, Sali Berisha i ka bërë të qartë kryeministrit Edi Rama se qëllimet e vizitës së tij në Athinë, dihen tashmë botërisht. ‘Edi Rama, të gjithë e dinin se ti shkoje për të mbjellë sherre aty, për të mbuluar vjedhjet tuaja, bëmat e narkoshtetit tënd’, theksoi Berisha gjatë fjalës së tij në protestën maratonë që zhvillohet në ‘Rrugën e Shpresës’.
Berisha i ka bërë një premtim emigrantëve shqiptarë, në momentin që PD do të vijë në pushtet. ‘PD ju jep fjalën ju se pas kthimit në pushtet do keni kuadrin ligjor më tërheqësin për investimet tuaja, për punësimin tuaj’, u shpreh Berisha.
Gjatë fjalës në tubimin e Shpresës, kryetari i Partisë Demokratike, Sali Berisha tha se, Erion Veliaj ishte nisur për një Athinë, por përfundoi në Venecia, ku ka ndenjur në hotele me 2 a 3 mijë euro, të paguara nga lekët e shqiptarëve. Berisha u bëri thirrje qytetarëve që dita e martë të jetë e fundit për Veliajn, në bashkinë e Tiranës.
FJALA E PLOTE
Mirëmbrëma qëndrestare dhe qendrestarë, misionarë të shpresës, besimit dhe lirisë.
Përshëndetjet e mia më të përzemërta, mirënjohjen më të pakufishme për betejën tuaj pa kthim, betejë për dinjitetin, shpresën dhe të ardhmen e shqiptarëve.
Mirënjohje të pakufishme ndaj oratorëve që nga tribuna e këtij parlamenti të lirë, tejshkojnë vellon e zezë të censurës së narkoregjimit dhe përcjellin në mendjen dhe zemrat e shqiptarëve të vërtetat e mëdha, të qytetarit shqiptar, shoqërisë shqiptare dhe vendit tonë.
Të dashur miq!
Ne së bashku çdo natë kemi denoncuar këtu, kemi protestuar me të gjithë forcën tonë kundër diktaturës së re, të bazuar në krimin, drogën dhe vjedhjen e shqiptarëve.
Kemi protestuar dhe protestojmë sepse Edi Rama, Erion Veliaj, ministrat, kanë vendosur në këtë vend, tiraninë e varfërisë nga vjedhjet e shekullit.
Kemi protestuar së bashku dhe protestojmë për çdo qytetare dhe qytetar të këtij vendi, pavarësisht nga bindjet e tij politike, por që e sheh, e ndjen se vjedhja e qeveritarëve po rëndon çdo ditë e më shumë jetën e tyre, po bën të padurueshme jetën në Shqipëri.
Kemi protestuar dhe vazhdojmë betejën për të gjithë shqiptarët kudo që janë, emigracion, diasporë, sepse Shqipëria nga vend i bekuar po shndërrohet në një vend të ndëshkuar nga Edi Rama dhe miqtë e tij.
Miqtë e mi!
Në kulmin e betejës tonë për çlirimin e bashkisë së Tiranës, për marshin e pandalshëm drejt qeverisë teknike, Edi Rama zgjodhi të mbulojë me propagandën e tij koprolalike, me organizimin e një takimi me emigracionin tonë në Athinë.
Miq!
Sonte dua të ndjeheni më krenarë se kurrë me veten tuaj, protestën tuaj.
Dua të ndjeheni më krenarë se sonte u faktua në mënyrë përfundimtare se zëri i protestës tuaj, kauza e drejtë e protestës tuaj ka prekur mendjen dhe zemrat e mbarë emigracionit shqiptar në Greqi dhe kudo në botë.
U bënë shpenzime kolosale, u kontraktuan çartera dhe u shpërndanë 2-300 litra naftë për person. U shpenzuan pothuajse 1 mln euro për shoën e Edi Ramës me të cilin kërkonte që të mbulonte superskandalet, vjedhjet e veta, të Erion Veliajt dhe suitës së tij.
Por çfarë ndodhi?
Çdo shqiptar duhet të ndihet krenar me emigracionin tonë në Greqi, se nuk doli një vajzë nëne, nuk doli një bir nëne, se nuk doli një shqiptar, se nuk doli një shqiptare, një grek apo grek mik i tyre, të përshëndet Edi Ramën, por mbeti me përshëndetjen e Elisës së tij, Spiropali.
Miq!
Ky refuzim, ky përçmim me heshtje të plotë, ky qëndrim përbuzës për të mos i dhënë një përshëndetje minimale, dëshmon se zëri juaj dëgjohet çdo natë. Dëshmon se Edi Rama është më i përçmuari, udhëheqës, kryeministër i Ballkanit, Europës dhe më gjerë.
Tu biesh tam tameve se do vij e do vij, të mbledhësh soj e sorollop, trafikant, delinkuent, kriminel, me Pirina e Bufëra etj., e të shkosh atje e të mos gjesh një njeri të vetëm të të thotë; faleminderit që erdhe, të të japë një përshëndetje në emër të familjes së tij, të komunitetit, por të mbetesh në përshëndetjen e Elisës nuk ka mjerim më të madh, nuk ka turpërim më të madh.
Edi Rama të rezervuan përshëndetjen që meriton, armiku i tyre. Të lanë në mëshirën e Elisës të të thotë dy fjalë ngushëlluese.
Ata përfaqësuan kombin sot me dinjitetin më të madh.
Emigracioni ynë në Greqi dhe kudo e dinë se Edi Rama është Pashiqi i Tiranës, është Çubrilloviqi shqipfolës, është njeriu që Shqipërinë tokë e bekuar e zbrazi në 10 vite më shumë se çdo luftë civile, se çdo luftë lokale, se çdo luftë botërore ka zbrazur një vend.
Edi Rama nuk të përshëndetën ata, të refuzuan, se bënin mëkat para kombit.
Refuzuan, se mbrojtën dinjitetin e kombit të tyre, të nënës së tyre, Shqipëri.
Edi Rama nuk kanë harruar dhe nuk harrojnë ata se si morën malet për tu larguar nga Shqipëria gjatë sundimit tënd, se si ti në një krim të mirëfilltë kundër njerëzimit, i le vëllezërit dhe motrat tona gjatë kovidit, 4 ditë e net në acarin e dimrit, në Devoll, në tokën e askujt dhe nuk i lejoje të futeshin në Shqipëri, o katil.
U kërkove ti të falur atyre, o i pashpirt se atë që bëre ti nuk e bën kurrë një njeri human.
I le vetëm e vetëm për të ushtruar terror mbi popullin tënd, me diktaturën e re të kovidit.
Edi Rama nuk doli një njeri të të bëjë përshëndetjen më të vogël. Një refuzim të tillë nuk mban mend historia.
Të gjithë e dinin se ti shkoje për sherr aty, ti shkoje për të mbjellë sherre për të mbuluar vjedhjet tuaja, të mbulosh bëmat dhe gjëmat e narkoshtetit tënd.
Harrove ti se ke vendosur në Shqipëri narkoshtetin, se ke rrënuar votën e lirë, se ke bllokuar rotacionin, se do të shkatërrosh pluralizmin, se mban në arrest politik kundërshtarët e tu.
Se për pronat e Olta Xhaçkës dhe Olsi Ramës u vë kazmën marrëdhënieve me fqinjin shekullor.
Edhe njëherë mendove se do ti joshësh ata, siç josh këtu ndonjë lake tëndin që lëpin kockat që u hedh çdo ditë me çështjen Beleri.
Ata kanë vite e dekada në një vend të lirë dhe demokratik. Ata e dinë siç duhet ta dijë çdo shqiptar se prezumimi i pafajësisë është ligj universal pa të cilin nuk ka liri dhe se ti ja mohon këtë parim kundërshtarëve të tu politik.
E bën këtë se Beleri në detyrë do të nxjerrë të gjithë defterët e pista të tuat dhe të hajdutëve të tu, plaçkitje që u ke bërë pronave të himarjotëve dhe qytetarëve të bregut.
Fole e stërfole, të dëgjoi Pirini, të dëgjuan bashkëhajdutët e tu. Krahasove emigrantët shqiptarë me çamët, banorë shekullorë të Çamërisë. Gjer sot nuk kisha dëgjuar kurrë. Vetëm një mendje e sëmurë si e jotja mund të bëjë një krahasim të tillë.
Miqtë e mi!
Më lejoni këtu para jush të ftoj nga zemra, diasporën dhe emigracionin të vijnë në Tiranë, të bashkohemi në këtë betejë për nënë Shqipëi, në këtë betejë për kombin tonë, në këtë betejë për të ardhmen tonë.
Emigrante dhe emigrantë kudo që jeni, mos harroni se ishin vitet 2008-2012 në të cilat ju vërshuat drejt vendit tuaj. Mbi 200 mijë familje emigrantë nga të katër anët e Europës u rikthyen në Shqipëri, me një kuadër ligjor që i mbronte ata të prosperonin me biznesin e tyre.
Partia Demokratike ju jep fjalën ju se pas kthimit në pushtet, kuadri ligjor special dhe i veçantë do të jetë për çdo emigrant.
Ju erdhët në Shqipëri sepse e gjenit vendin 5 vite pa taksa. Përsëri do të vini me një kuadër ligjor, më të mirin, më tërheqësin për investimet tuaja, për punësimin tuaj, për dinjitetin tuaj.
Koha është të bashkohemi.
Ti jepni ju sot kudo që jeni, një krah Shqipërisë.
Të shkojmë drejt qeverisë teknike, zgjedhjeve të lira dhe të ndahemi nga kjo organizatë kriminale.
Miqtë mi!
Unë e kam një përshëndetje të veçantë sonte, e do të ju marr dhe ju leje për të gjithë socialistët shqiptarë në Greqi, që e treguan veten socialistë dhe jo rilindas, që refuzuan të përshëndesin Edi Ramën, simbolin e shëmtuar të vjedhjes, varfërimit të shqiptarëve.
I bëtë një shërbim kombit me këtë qëndrim.
Së fundi të dashur miq!
Kjo ngjarje e sotme duhet të na motivojë dhe më shumë. Duhet të na bëjë me krahë. Zemërimi dhe guximi ynë nuk duhet të njohë kufij, sepse sot më shumë se kurrë, përfaqësojmë kombin shqiptar, fatin dhe të ardhmen e tij.
Erion Veliaj që me paratë e vjedhura ishte nisur për në Athinë, por kishte përfunduar në Venecia në hotelet me 2 mijë euro apo 3 mijë, ta ketë ditën e fundit, ditën e martë në bashkinë e Tiranës.
Koha po vjen, nga fitorja tek bashkia në fitoren për Shqipërinë.
Edhe njëherë ju përshëndes përzemërsisht, përshëndes emigracionin tonë në Greqi dhe kudo që ndodhet për leksionin që i dha, dhe i them Edi Ramës se ky është vetëm fillimi.
Edhe po të mbledhësh të gjithë trafikantët e Shqipërisë kudo që janë, do të përfaqësosh vetëm krimin vjedhjen e jo shqiptarët.
Rroftë Shqipëria.
Fitore, fitore, fitore!
