Gazeta RD
FBI e ka identifikuar autorin e atentatit ndaj ish-presidentit Donald Trump si 20-vjeçarin Thomas Matthew Crooks.
Shërbimi Sekret i SHBA-së tha në një deklaratë se sulmuesi “qëlloi të shtëna të shumta drejt skenës nga një pozicion i ngritur jashtë tubimit” përpara se të “neutralizohej” nga agjentët.
Donald Trump u nxor nga skena me gjak në fytyrë pas të shtënave në Butler. Incidenti tronditës ndodhi dy ditë para fillimit të Konventës Kombëtare Republikane në Milwaukee, ku Trump do të bëhet zyrtarisht kandidati i partisë.
Sipas të dhënave, sulmuesi i dyshuar ishte i regjistruar si votues republikan në Pensilvani. Por, sipas raporteve federale financiare të fushatave zgjedhore, ai po ashtu kishte dhënë 15 dollarë donacion për një komitet politik progresiv më 20 janar 2021, në ditën kur presidenti Joe Biden bëri betimin.
Thomas Matthew Crooks ishte banor i Bethel Park në Pensilvani. Ai duket se është diplomuar në vitin 2022 nga shkolla e mesme Bethel Park. Ai madje mori një “çmim yjesh” prej 500 dollarësh atë vit nga Iniciativa Kombëtare e Matematikës dhe Shkencës, sipas The Tribune-Review në Pensilvaninë perëndimore.
Ai ishte i armatosur me një pushkë gjysmë automatike AR-15. Dëshmitarë të shumtë thanë se e panë atë përpara të shtënave dhe njoftuan autoritetet.
Crooks u pozicionua në çatinë e një ndërtese rreth 130 metra larg skenës ku Donald Trump po i drejtohej tubimit.
Ai u qëllua për vdekje nga zyrtarët e Shërbimit Sekret pas sulmit ndaj ish-presidentit amerikan 78-vjeçar. Policia tha se motivi i Crooks pas qëllimit ndaj kandidatit të supozuar republikan për president është i paqartë.
