Gazeta RD
Mediat e mëdha ndërkombëtare po i bëjnë jehonë vizitës së presidentit turk, Recep Tayyip Erdogan në Tiranë.
Gazeta e njohur amerikane ‘Washington Post’ shkruan se, Erdogan inauguroi një xhami të financuar nga Turqia dhe sulmoi ashpër Izraelin gjatë vizitës në Shqipëri.
“Presidenti i Turqisë udhëtoi të enjten në kryeqytetin e Shqipërisë për të përuruar një xhami të financuar nga Turqia me minare 50 metra të larta si pjesë e një udhëtimi për të forcuar lidhjet dhe për të diskutuar çështjet rajonale.
Presidenti turk Recep Tayyip Erdogan tha gjithashtu se vendi i tij do të japë një numër të papërcaktuar dronësh për të rritur aftësitë ushtarake në Shqipëri, popullsia e së cilës është pak më shumë se 50% myslimane.
Xhamia e re e Namazgjasë në Tiranë është një nga më të mëdhatë në Ballkan.
Erdogan u takua me presidentin shqiptar Bajram Begaj dhe më pas me kryeministrin Edi Rama, me të cilin ka lidhje të ngushta. Pas një takimi të zyrtarëve të lartë nga të dy vendet, të dyja palët nënshkruan marrëveshje për të nxitur bashkëpunimin në bujqësi dhe arsim.
Turqia është një partner strategjik i Shqipërisë dhe një nga investitorët e saj më të mëdhenj, duke kontribuar në infrastrukturë dhe sektorë të tjerë. Erdogan tha se të dy vendet duhet të synojnë të dyfishojnë tregtinë e tyre vjetore në 2 miliardë euro (2.2 miliardë dollarë).
Në një konferencë pas takimeve, Rama tha se dhurata e Turqisë me dronët ushtarakë dërgon një “mesazh shumë të qartë” se “Shqipëria nuk mund të sulmohet”.
Në komentet që prekin çështjet rajonale, Erdogan denoncoi luftën e Izraelit kundër Hamasit në Gaza si një “gjenocid” dhe një “kërcënim për rendin global”, shkruan gazeta.
