Gazeta RD
Ish-Presidenti i Republikës, Ilir Meta ka reaguar nga qelia, pasi u arrestua sot me urdhër të SPAK, teksa u shoqërua dhunshëm nga efektivët e Policisë, duke u tërhequr zvarrë nga automjeti i tij.
Teksa falenderon anëtarët e PL-së për mbështetjen që i kanë dhënë, Meta shprehet se nga lufta e tyre nis një faqe të re në përballjen pa asnjë kompromis me Narkoshtetin e instaluar brutalisht.
Në një postim në rrjetet sociale, Meta shkruan se rrëmbimi i tij sot në mënyrën më banditeske tregon panikun e regjimit diktatorial nga ballafaqimi me të vërtetat. Ai shton më tej se tashmë ndihet më i fortë dhe beson edhe më shumë në pafajlsinë e tij.
Meta deklaron se ndihet krenar që është rrëmbyer dhunshëm nga antishqiptarët dhe shqipfolësit vetëm për patriotizmin e tij dhe mbrojtjen e interesave kombëtare.
Reagimi i plotë
Falenderoj përzemërsisht të gjithë anëtarët e Partisë së Lirisë për mbështetjen e jashtëzakonshme që më kanë dhënë deri tani.
Po kështu nga sot lufta jonë nis një faqe të re në përballjen pa asnjë kompromis me Narkoshtetin e instaluar brutalisht.
Jam i bindur në fitoren e kauzave tona kombëtare dhe demokratike!
Armiqtë e kombit tonë dhe demokracisë do u ngrijë e qeshura në buzë!
Rrëmbimi im sot në mënyrën më banditeske tregon panikun e regjimit diktatorial nga ballafaqimi me të vërtetat.
Ju siguroj se pas njohjes me vendimin e arrestimit tim ndihem më i fortë se kurrë dhe besoj edhe shumë në pafajësinë time të plotë.
Ndihem krenar që jam rrëmbyer dhunshëm nga antishqiptarët dhe shqipfolësit vetëm për patriotizmin tim dhe mbrojtjen e interesave kombëtare.
