Gazeta RD
Enton DOÇI
Lyon
“Mbështetësit e kandidatit republikan për president Donald Trump janë plehra”, tha të martën presidenti amerikan në largim, Joe Biden. Ai më vonë pretendoi se foli gabim dhe se donte të sulmonte një folës specifik në tubimin e fundit të Trump-it në Madison Square Garden.
Biden i bëri komentet gjatë një telefonate në Zoom të organizuar nga grupi i avokimit hispanik Voto Latino. Ai filloi duke përmendur komedianin Tony Hinchcliffe i cili bëri një shaka të dielën duke e krahasuar Puerto Rikon me “një ishull lundrues plehrash në mes të oqeanit”.
“Ditën tjetër, një folës në tubimin e Trump-it e quajti Porto Rikon një ishull lundrues plehrash,” tha Biden, duke shtuar se portorikanët janë “njerëz të mirë, të nderuar”.
“Të vetmet plehra që shoh që qarkullojnë atje janë mbështetësit e tij. Demonizimi i tij i latinëve është i pandërgjegjshëm dhe është joamerikan”, theksoi Biden. “Është krejtësisht në kundërshtim me gjithçka që kemi bërë, gjithçka që kemi qenë.”
Presidenti vazhdoi të akuzonte Trump-in se po përpiqej të “ndante vendin në bazë të racës” dhe këmbënguli që kandidatja demokrate, nënpresidentja Kamala Harris, “do të jetë një presidente për të gjithë Amerikën”.
Biden më vonë u shfaq në X për të sqaruar se ai i ishte referuar retorikës urrejtëse për Porto Rikon e përhapur nga mbështetësi i Trump-it në tubimin e tij në Madison Square Garden si plehra.
“Kjo është gjithçka që kam dashur të them. Komentet në atë tubim nuk pasqyrojnë kush jemi ne si komb”, shkroi Biden.
Vërejtjet e presidentit u dënuan shpejt nga aleatët e Trump-it. “Ai po flet për amerikanët e zakonshëm që e duan vendin e tyre,” tha senatori republikan Marco Rubio, duke i kërkuar ekipit të fushatës së Harrisit që të kërkonte falje. “Ne nuk jemi plehra, ne jemi patriotë që e duam Amerikën”, tha Rubio gjatë një mitingu të Trump-it në Allentown, Pensilvani.
Kandidati republikan u shfaq më tej me uniformën e punëtorëve të pastrimit, në shenjë solidariteti me ta, madje ai bëri edhe udhëtim me makinën që transporton plehrat, një gjetje politike që është komentuar gjerësisht në SHBA.
Hinchcliffe akuzoi demokratët për reagim të tepruar ndaj grupit të tij në eventin e Madison Square Garden. “Këta njerëz nuk kanë sens humori,” shkroi ai në X të dielën, duke argumentuar se ekipi i Harrisit e kishte nxjerrë shakanë jashtë kontekstit “për ta bërë të duket raciste”.
Si demokratët ashtu edhe republikanët kanë akuzuar shpesh njëri-tjetrin për retorikë urrejtjeje dhe demonizim. Disa konservatorë kanë tërhequr një paralele midis komentit të “plehra” të Biden-it dhe atij të Hillary Clinton-it, e cila i përshkroi mbështetësit e Trump në vitin 2016 si një “grup mjeranësh”. Trump kohët e fundit është kritikuar për etiketimin e kundërshtarëve të tij si “armiku nga brenda”./Associated Press
