Maskra e Shkodrës/ PD kërkon komision hetimor parlamentar për lidhjet qeveri-krim

Partia Demokratike përmes një deklarate për mediat ka kërkuar ngritjen e një komisioni hetimor parlamentar për hetimin e lidhjeve të qeverisë me krimin. Kjo kërkesë vjen pas ngjarjes tragjike të Shkodrës ku mbetën të vrarë 4 persona të pafajshëm si pasojë e përplasjes mes bandave kriminale.

Në disa denoncime është ngritur dyshimi i fortë se viktimat u nxorën në pritë nga policia e Shkodrës e cila është bërë njësh me bandat, në vend të sigurojë rend e siguri për qytetarët.

Njëri prej viktimave, Arlind Bushati pati kërkuar ndihmën e policisë vetëm disa ditë para se të vritej pasi ishte kërcënuar nga bandat në mes të qytetit, por policia nuk mori asnjë masë për sigurinë e tij.

Deklarata e Partisë Demokratike të Shqipërisë:

Masakra e Shkodrës, me tri viktima, është përmbyllur dje me vdekjen nga plagët e marra të Bashkim Bashës, bashkëshort i Fluturës që mbeti e vrarë më 30 tetor.

Partia Demokratike i shpreh ngushëllime të sinqerta familjes Basha në këtë tragjedi të dyfishtë.

Gjaku i katër të vrarëve në lagjen Dobraç duhet të rëndojë mbi shkaktarët e vërtetë, pushtetin e inkriminuar të Edi Ramës, që mbahet në këmbë nga bashkëpunimi me bandat.

Terrori i 30 tetorit, kundër të cilit opozita dhe qytetarët e Shkodrës organizuan marshimin e protestës më 2 nëntor, i ka rrënjët pikërisht te leja që pushteti u jep bandave për të vepruar të lira, pasi narko-kriminelët e kanë ndihmuar të rrëmbejë zgjedhjet.

Pas vjedhjes të zgjedhjeve bandat kërkojnë edhe sigurinë, jetën, qetësinë dhe rendin e Shkodrës dhe të Shqipërisë e qytetarëve shqiptarë.

Partia Demokratike qëndron fort pas propozimit për Komisionin Parlamentar të së Vërtetës. Vetëm duke zbuluar dhe dënuar lidhjet qeveri-polici-drejtësi-krim rrethi i vdekjes dhe terrorit do të ndalet.

Të pafajshmit e Shkodrës, dhe viktima të tjera atentatesh në të gjithë vendin, duhen rehabilituar, më së pari duke zbuluar dhe dënuar fajtorët.

Së dyti, duke siguruar se nuk ka amnisti për ata që kanë ua kanë shitur partnerëve në krim rendin dhe sigurinë publike, për të mbajtur me çdo kusht pushtetin.

Pa një qeveri teknike asnjanëse, kjo amnisi nuk do të ndalet sepse do të vazhdojë përdorimi i bandave në zgjedhje dhe më pas dëmshpërblimi i tyre me territore dhe liri lëvizje e veprimi.

Pa zgjedhje të lira nuk ka zgjidhje.