Gazeta RD
Nga Besa MANAJ
Për dekada me radhë, Kukësi ka qëndruar i harruar, duke vuajtur pasojat e një zinxhiri të gjatë degradimi social, ekonomik dhe politik. Ky qytet, dikur një shembull i krenarisë dhe rezistencës, është kthyer në një simbol të varfërisë së thellë, të neglizhencës dhe të politikave të dështuara.
Sot, Kukësi nuk është thjesht një qytet në krizë – është një plagë e hapur në trupin e Shqipërisë, e cila kërkon shërim të menjëhershëm dhe transformim të thellë.
Politika që ka vrarë shpresën
Kukësi është dëshmia më e gjallë e asaj që ndodh kur politika shndërrohet në një arenë përçarjesh dhe korrupsioni. Forcat politike lokale janë përfshirë në lojëra të vogla interesi, ndërsa nevojat jetike të qytetarëve janë lënë në hije. Në vend të vizionit dhe strategjisë për zhvillim afatgjatë, kemi pasur një administratë të paaftë, të mbushur me emërime klienteliste, e cila ka përkeqësuar më tej situatën. Ky cikël korrupsioni ka konsumuar burimet e pakta të qytetit dhe ka lënë institucionet në një gjendje të mjerueshme.
Nga ana tjetër, qeverisja qendrore ka shërbyer më shumë si një mjet për shfrytëzim dhe axhenda elektorale sesa si një partner për zhvillim. Kukësi është përdorur si kartë politike, pa marrë asnjëherë përfitime konkrete për qytetarët e tij. Margjinalizimi i përhershëm politik ka rrënjosur një ndjenjë të thellë zhgënjimi dhe mosbesimi ndaj institucioneve, duke e lënë qytetin të zhytur në një apati të rrezikshme.
Ekonomia e nëpërkëmbur
Pavarësisht pasurive të shumta natyrore – minierat, dhe potencialet për turizëm – Kukësi mbetet një nga rajonet më të varfra të Shqipërisë. Këto burime janë shfrytëzuar në mënyrë të papërgjegjshme, pa planifikim afatgjatë dhe shpesh me dëme të mëdha mjedisore. Industria minerale, në vend që të ishte motori i zhvillimit ekonomik, është kthyer në një plagë për mjedisin dhe një burim padrejtësie dhe poshterimit ekonomik.
Mungesa e diversifikimit ekonomik dhe investimeve strategjike ka bërë që rinia kuksiane të shohë emigracionin si të vetmen rrugëdalje. Zonat rurale janë shpopulluar, bizneset janë mbyllur, dhe qyteti po humb përditë më shumë kapitalin e tij njerëzor. Në vend të një ekonomie që prodhon dhe eksporton, Kukësi është kthyer në një ekonomi të varur nga remitancat, që ushqejnë një varfëri të heshtur dhe konsistente.
Shoqëria në krizë identiteti
Emigracioni masiv nuk ka dëmtuar vetëm ekonominë, por ka shkatërruar edhe strukturën sociale të Kukësit. Familjet janë të ndara, komunitetet janë shpërbërë dhe traditat janë harruar. Kukësi, dikur një vatër e pasur kulture dhe solidariteti, sot po humb identitetin e tij në heshtje.
Rimëkëmbja e Kukësit nuk është thjesht një aspiratë lokale, por një sfidë kombëtare dhe një kauzë madhore që kërkon lidership vizionar, mobilizim qytetar dhe transformim rrënjësor. Ky qytet, i pasur me histori dhe potencial të jashtëzakonshëm, mund të kthehet në një shembull frymëzues për gjithë Shqipërinë. Për ta bërë këtë vizion realitet, nevojiten politika të guximshme, veprime të koordinuara dhe një strategji gjithëpërfshirëse nepermjet :
1.Reforma Radikale dhe Transparencë Absolute në Qeverisje
Luftë pa kompromis ndaj korrupsionit Çmontimi i strukturave korruptive dhe krijimi i një administrate që llogaridhënie e ka standard bazë.
Liderë me integritet-Ngritja e një lidershipi të ri që prioritizon qytetarët dhe që punon mbi baza të matshme dhe afatgjata.
- Ekonomi e Diversifikuar dhe Motor i Rritjes Rajonale dhe ndryshimin e ligjit per renten minerare.
Transformimi i bujqësisë- Nga bujqësi tradicionale drejt një sektori të mekanizuar, të integruar me tregjet kombëtare dhe ndërkombëtare.
Turizëm me ndikim ekonomik- Krijimi i një infrastrukture për turizëm ekologjik dhe kulturor që pozicionon Kukësin si një destinacion unik në rajon.
Zona të lira ekonomike- Krijimi i hapësirave të veçanta për tërheqjen e investimeve, duke nxitur industrinë dhe teknologjinë si shtylla të zhvillimit.
- Kapitalit Njerëzor –Arteria kryesore e Zhvillimit
Arsim për zhvillim ekonomik-Hapja e qendrave të aftësimit profesional, të dizajnuara sipas nevojave specifike të tregut lokal dhe rajonal.
Rikthimi i trurit- Nisma të fuqishme për të tërhequr profesionistët e larguar, me stimuj ekonomikë dhe shërbime moderne.
Nxitja e punësimit- Politika që garantojnë vende pune cilësore për të rinjtë, duke ndaluar emigrimin masiv.
- Rikthimi i Besimit tek Institucionet
Qeverisje e hapur- Çdo projekt, fond dhe vendim të bëhet publik për qytetarët në kohë reale përmes platformave dixhitale.
Bashkëpunim i vazhdueshëm me komunitetin- Angazhimi i qytetarëve në vendosjen e prioriteteve dhe monitorimin e progresit.
- Trashëgimia dhe Mjedisi si Pasuri Kombëtare
Rimëkëmbja e Kukësit është më shumë se një domosdoshmëri; është një mundësi për të dëshmuar se fuqia e një qyteti qëndron te vullneti i tij për ndryshim. Ky qytet, sot simbol i braktisjes, mund të bëhet model i progresit dhe shpresës për gjithë Shqipërinë.
Kukësi meriton të jetë një simbol i fuqisë, dinjitetit dhe mundësive të pakufizuara.
