Gazeta RD
“Për administratën amerikane, siguria evropiane është e rëndësishme, siç është gjetja e një “zgjidhjeje të arsyeshme” për konfliktin midis Rusisë dhe Ukrainës”. Kështu u shpreh në fjalimin e tij në Konferencën e Sigurisë në Mynih, zv/presidenti amerikan, James David Vance.
“Ne gjithashtu besojmë se është e rëndësishme në vitet e ardhshme që Europa të rritet masivisht për të siguruar mbrojtjen e saj. Kërcënimi që më shqetëson më shumë për Europën nuk është Rusia, nuk është Kina, nuk është ndonjë aktor tjetër i jashtëm. Ajo që më shqetëson është kërcënimi nga brenda, tërheqja e Europës nga disa nga vlerat e saj më themelore, vlerat e përbashkëta me Shtetet e Bashkuara”, tha zv/presidenti.
“Më ka habitur fakti që një ish-komisioner europian doli kohët e fundit në televizion dhe u gëzua që qeveria rumune sapo kishte anuluar zgjedhjet” dhe paralajmëroi se “nëse gjërat nuk shkojnë siç ishte planifikuar, e njëjta gjë mund të ndodhë edhe në Gjermani”. “Deklarata të tilla rastësore janë tronditëse për veshët amerikanë”, vijoi ai.
“Dezinformimi dhe liria e fjalës në Evropë”
“Kam frikë se në Mbretërinë e Bashkuar dhe në mbarë Europën liria e fjalës po humbet. E pranoj që ndonjëherë zërat më të lartë në favor të censurës nuk vijnë nga Europa, por nga vendi im, ku administrata e mëparshme kërcënoi dhe ushtron presion ndaj kompanive të mediave sociale për të censuruar të ashtuquajturin dezinformim. Kur bëhet fjalë për dezinformata, si për shembull ideja se koronavirusi ka të ngjarë të ketë origjinën në një laborator në Kinë, qeveria jonë ka inkurajuar kompanitë private që të mbyllin gojën njerëzit që guxojnë të flasin atë që ka rezultuar të jetë një e vërtetë e dukshme,” tha Vance.
“Europa mes çështjeve ekonomike dhe sigurisë”
Për Shtetet e Bashkuara, është e rëndësishme që Evropa të “përparojë”, ndërsa Uashingtoni fokusohet në zonat e botës që janë në rrezik të madh, theksoi Vance.
“Si mund të filloni të mendoni për këto lloj çështjesh buxhetore nëse nuk e dini se çfarë po mbrojmë në radhë të parë? Tashmë kam dëgjuar shumë në bisedat e mia, kam pasur shumë biseda të rëndësishme me njerëz të ndryshëm të mbledhur këtu në këtë dhomë. Kam dëgjuar shumë për atë që duhet të mbrohesh, dhe sigurisht kjo është e rëndësishme. Por ajo që më dukej pak më pak e qartë për mua, dhe sigurisht mendoj për shumë qytetarë evropianë, është se nga çfarë po e mbroni veten tuaj”, tha Vance. “Unë besoj thellësisht se nuk ka siguri nëse keni frikë nga zëri, opinionet dhe ndërgjegjet që udhëheqin popullin tuaj”, shtoi ai. “Nëse keni frikë nga zgjedhësit tuaj, Amerika nuk mund të bëjë asgjë për ju”, tha zëvendëspresidenti.
Nëse Evropa dëshiron të “gëzojë ekonomi konkurruese, energji të përballueshme dhe zinxhirë të sigurt furnizimi”, atëherë “i duhen mandate për të qeverisur, sepse do të jetë e nevojshme të “bëhen zgjedhje të vështira për t’i shijuar të gjitha këto gjëra”. “Nuk mund të marrësh një mandat demokratik duke censuruar kundërshtarët ose duke i futur në burg, qoftë liderët e opozitës, një të krishterë të thjeshtë që lutet në shtëpinë e tij apo një gazetar që përpiqet të raportojë lajmet,” shtoi ai. “As nuk mund të merret një mandat duke injoruar bazën e elektoratit për çështje të tilla si kush mund të bëhet pjesë e shoqërisë sonë të përbashkët”, shpjegoi numri 2 i SHBA.
