Gazeta RD
Nga Boldnews.al
Ervin Karamuço, pedagog dhe ekspert sigurie, deklaroi një ditë më parë në studion e “Euronews Albania” se Prokuroria e Posaçme ka vënë në përgjim anëtarë të Gjykatës Kushtetuese, nën dyshimet për abuzim me detyrën.
Karamuço nuk dha më shumë detaje se për çfarë dhe ndaj kujt ka nisur ky hetim apo përgjimi i supozuar.
Ndërkohë, ish-prokurori i Krimeve të Rënda, Eugen Beçi, i ftuar në të njëjtin panel, deklaroi se “në rast se ky informacion është i vërtetë, ai përbën një rast skandaloz se si mund të abuzohet me pushtetin që kanë në dorë prokurorët e posaçëm dhe se si një hetim mund të dalë nga shinat e ligjshmërisë dhe të kthehet në abuziv”.
Beçi, referuar përvojës së tij, deklaroi se “nëse ka nisur një procedim penal pa një fakt konkret, pa një vepër penale apo shkelje konkrete, e gjithë situata mund të shndërrohet në një intimidim dhe presion apo cënim të hapur të pavarësisë së gjyqtarëve kushtetues”.
Në mesin e vitit 2024, Gjykata Kushtetuese mori një kërkesë nga palë të interesuara për të shpallur të paligjshme mesazhet në SKY.
Burime të ndryshme tregojnë se gjatë shqyrtimit të kësaj dosjeje, një prej gjyqtarëve ka raportuar pranë SPAK-ut për ndërhyrje jo-normale nga ana e një kolegut të tij. Për momentin, nuk është e qartë nëse ka pasur një raportim të tillë dhe nëse ky raportim ka shërbyer për nisjen e “përgjimeve” ndaj gjyqtarëve kushtetues që u pretenduan nga eksperti Karamuço.
Gjithashtu, nëse ka pasur “përgjim” të gjyqtarëve kushtetues, nuk është e qartë nëse ka qenë interceptim procedurial, pra i urdhëruar nga prokurori, apo parandalues, që kryhet nga Policia ose shërbimet inteligjente.
Zëra të ndryshëm publikë, përfshirë edhe ish-kryeministrin Sali Berisha, kanë ngritur më herët shqetësimin se Gjykata Kushtetuese gjendet nën presion për vendimmarrjen mbi “Sky/ECC” nga rryma të ndryshme të interesuara.
Edhe “Boldnews.al” ka raportuar më herët për ekzistencën e “ndërhyrjeve” të mundshme në këtë histori.
Megjithatë, në 30 dhjetor të vitit 2024, Gjykata Kushtetuese rrëzoi në unanimitet kërkesën për shpalljen e paligjshme të komunikimeve “SKY”.
Ky vendim krijon premisat që, në rast se deklaratat e Karamuços lidhen për këtë rast, “ndërhyrja” ose nuk e ka arritur qëllimin ose mund të mos ketë pasur aspak “ndërhyrje”.
Ish-prokurori Beçi deklaron se “Në rast se një prokurori nis cështjen penale për të kuptuar nëse individi shkel apo jo ligjin, është gabim… Por, nëse çështja penale ka nisur me idenë që unë të mbaj nën kontroll anëtarët e Gjykatës Kushtetuese pa pasur indicje të forta ligjore, atëherë në këtë formë cënohet vendimmarrja e tyre e pavarur dhe objektive dhe është në kufijtë e shpërdorimit të detyrës që mund të bëjnë prokurorët”.
Gjyqtarët kushtetues janë subjekte hetimorë të Prokurorisë së Posaçme Anti-Korrupsion, bazuar në nenin 75 të Kodit të Procedurës Penale.
Hetimi, përfshirë edhe vendosja nën përgjim e tyre, nuk ka nevojë për autorizim të posaçëm, por kryhet nga Prokuroria e Posaçme kur kanë indicje dhe prova për përfshirjen e tyre në vepra penale.
Kushtetuta, në nenin 126 të saj, parashikon se “Gjyqtari i Gjykatës Kushtetuese gëzon imunitet për mendimet e shprehura dhe vendimet e marra në ushtrim të funksioneve të tij, përveç rasteve kur ai ka vepruar për një interes vetjak ose me keqbesim”.
