Gazeta RD
Prokuroria e Posaçme ka mbyllur hetimet për dosjen “SASPAC” dhe ka dërguar për gjykim ish-ministrin e Shëndetësisë, Ilir Beqaj dhe personat e tjerë të pandehur.
Sipas SPAK, Beqaj dhe të pandehurit e tjerë akuzohen për veprime të shumta penale, përfshirë korrupsionin, falsifikim dokumentash, mashtrim dhe shkelje të procedurave të tenderëve publikë.
Hetimet kanë zbuluar se gjatë periudhës 2022-2023, ata kanë realizuar tendera fiktivë dhe kanë përfituar në mënyrë të jashtëligjshme nga kontratat e financuara nga Bashkimi Evropian. Pasuritë e dyshuara janë sekuestruar si pjesë e hetimeve, përfshirë prona dhe llogari bankare të lidhura me të pandehurit.
Në njoftimin e SPAK janë zbardhur edhe akuzat që rëndojnë ndaj secilit prej të pandehurve. Personat e pandehur janë, Ilir Beqaj, Ermal Kurtulaj, Gazmend Haxhia, Personi juridik shoqëria tregtare “Landways International” sh.p.k , Alfred Nikolla, Elton Marini, Personi juridik shoqëria tregtare “Nine Service Int” sh.p.k, Bjona Ziaj, Bledar Leka, Marinela Jazoj, Mira Topçiu.
Gjithashtu, Ilir Beqaj është akuzuar për deklarim të rremë të pasurisë, duke fshehur interesat e tij financiare. Hetimet vazhdojnë për zbardhjen e rasteve të tjera penale që lidhen me këtë çështje.
Beqaj akuzohet për kryerjen e veprave penale: “Korrupsion pasiv i funksionarëve të lartë shtetërore” kryer në bashkëpunim (2 herë); “Shkelja e barazisë së pjesëmarrësve në tendera apo ankande publike” kryer në bashkëpunim; “Falsifikim i dokumentave”, nga personi që ka për detyrë kryer në bashkëpunim, e kryer 9 herë; “Mashtrim” kryer në bashkëpunim me pasoja të rënda kryer 2 herë; “Mashtrim” kryer në bashkëpunim”, e kryer 3 herë; “Refuzimi për deklarimin, mosdeklarimi, fshehja ose deklarimi i rremë i pasurive, interesave privatë të personave të zgjedhur dhe nëpunësve publikë ose i çdo personi tjetër që ka detyrimin ligjor për deklarim”, e kryer 3 herë”.
Në njoftimin e SPAK, thuhet se në kuadër të hetimeve është vendosur sekuestro preventive mbi pasurinë e paluajtshme (apartament), me vendodhje në Lungomare, Vlorë dhe disa llogarive bankare, e të tjera sekuestruar të pandehurve, si më poshtë vijon:
14 323 125 (katërmbëdhjetë milion e treqind e njëzetë e tre mijë e njëqind e njëzetë e pesë) lekë;
15 542 (pesëmbëdhjetë mijë e pesëqind e dyzetë e dy) euro;
42 318 (dyzetë e dy mijë e treqind e tetëmbëdhjetë) USD;
19.4% të kuotave të shoqërisë tregtare “Albanian Food and Hospitality Services” sh.p.k.
Tre automjete regjistruar në pronësi të pandehurve
Prokuroria e Posaçme njofton gjithashtu se hetimet po vazhdojnë për fakte të tjera penale të rezultuara gjatë këtij procedimi penal.
Ky procedim penal është një nga rastet më të mëdha të korrupsionit të lidhur me administratën publike në Shqipëri dhe ka ngritur shqetësime për menaxhimin e fondeve të BE-së në vend.
